Раисиҷумҳури Қирғизистон Алмосбек Отамбоев рӯзи 17 июл дар қароргоҳаш дар Бишкек бо вазири хориҷаи Тоҷикистон Сироҷиддин Аслов мулоқот кард. Сироҷиддин Аслов бо як сафари расмӣ аз 15 июл дар Қирғизистон қарор дорад.
Бино ба гузориши сомонаи расмии раисиҷумҳури Қирғизистон, дар дидори Отамбоев бо Аслов масоили доғи равобити Қирғизистону Тоҷикистон баҳс шудааст.
Бино бар ин манбаъ, Алмосбек Отамбоев ба аҳамияти иҷрои тавофуқоти баластомада дар байни ду кишвар таъкид кардааст. Отамбоев афзудааст, ки мақомоти зисалоҳи ҳарду кишвар бояд ҳамкориро ба хотири "аз роҳи бархӯрди созанда ва мутавози ҳал кардани масоили мавҷуда байни Қирғизистону Тоҷикистон фаъолтар кунанд." Тафсилоти бештари ин мулоқот ҳанӯз дастрас нест.
Сироҷиддин Аслов нахустин узви баландпояи ҳукумати Тоҷикистон аст, ки дар пайи таниши ахири марзӣ ба Қирғизистон сафар ва бо раҳбарони аввали он кишвар мулоқот мекунад. Рӯзи 10 июл бар асари як тирпарронӣ дар марзи ҷамоати Ворухи ноҳияи Исфараи Тоҷикистон бо ноҳияи Бодканди Қирғизистон як сокини Ворух кушта ва 7 ҳамдеҳаи ӯ захмӣ шуданд. Ин низоъи мусаллаҳона дар пайи ба тармими қубурҳои обгузар пардохтани сокинони Ворух дар мавзеи баҳсии Бедак рух дод.
[ Ссылка ]
