Iryo juru ryera nk'inyange
Inyamibwa yabasumbye ahora atetse antegereje,
Niba ampamagaye ngo musange muzavuze impundu.
Nanjye nzitaba nshize impumu we !
Ijuru ndyinjiremo mpamiliza.

Niba ndangije ibyo gusaza
Muzavune sambwe musanze imigara;
Mwirinde amalira mu ngamba z'inganji.
Nanjye ubwo nzagenda nkeye we !
Intwali iramukiwe iratabara.

Nkunda ikondera ritsikimba.
Rizavuge cyane njye ndyumva umucyaho.
Inshuragane, urugunda, ikanka n'insengo,
Bizamperekeze neza we !
Nkunde nizihire itabaro.

Nkunda umulishyo uvuka iwacu.
Za ngoma z'umugendo zizaze urugereko,
Niba higanje agahinda zize zigahinde.
Muzazivuze urwunge we !
Mumperekeze zinihira.

Niba ngeze iyo hirya kandi,
Nzaramutsa amatorero muzi mu mihigo,
Nk'Imbasharugamba n'indinzi z'icyaga;
Kandi nzanamiza mbabwire we,
Yuko nsinze muvuna sambwe.

Umurage wera iwacu
W'urukundo rukwiye abavandimwe nkamwe,
Abakuru mururate abato barutore;
Nanjye aho nzaba ndi hirya we !
Iteka nzahora ndubyinilira.

Niba mwibarutsemo ikigoryi,
Ntimuzahite mwica ngo mujugunye mu rwobo;
Burya uwo uhana iyo atinze na we asa nk'abandi.
Jya ugoragoza nk'iminsi we !
Burya kubana ni ukugorora.

Niba nkumbuye inzira abali
Banyuragamo baza kwizihirwa mu biroli,
Bajye bambara imitambya bacyamure intambwe.
Aho nzaba ndi nanjye we !
Nzaba rwose nshize agahinda.

Niba hashize iminsi myinshi
Mbavuyemo ngiye, muzafate umuheto,
Mufate ingabo y'icondo n'icumu ry'injunga,
Mwese mwinikize murenze we !
Iyo nka muyigwemo munyibuka.

Iryo juru ryera nk'inyange...


( Cyprien Rugamba & Ballet Amasimbi n'Amakombe in "Umurage w'intore", Rwanda)

свернуть