Бүгін Таиланд полициясы жарылысқа қатысы бар деген күдіктіні анықтап, іздестіруді бастады. Бұл жөнінде елдің премьер-министрі өзі хабарлады. Полиция күдіктінің фотороботын жасап таратуда.
Фотода жарылыс болған жерде күмәнді сөмкені қойып кеткен ер адам бейнеленген. Таиландтың Қорғаныс министрінің мәліметінше, қаскөйлер туристік аймақты әдейі таңдап алған.
22 адамның өмірін қиған терактіні ешқандай ұйым өз мойнына алған жоқ. Ал оқиға орнында қазір мамандар жұмыс істеуде. Естеріңізге сала кетейік, кеше Бангкок қаласындағы Эраван шіркеуі мен сауда орталығына жақын жерде жарылыс болған еді. Қаланың дәл осы бөлігінде туристер көп жиналады.
Прают Чан-Оча, Таиланд корольдігінің премьер-министрі
-Біз жарылыс орнына жақын жерде орналасқан бейнекамераны тексердік. Онда күдікті түсіп қалған сияқты. Біз тергеу амалдарын жалғастыра береміз.
Еліміздің сыртқы істер министрлігі Бангкок қаласының туристік ауданында болған жарылыстан қаза болғандар мен жарақат алғандардың арасында Қазақстан азаматтары жоқ екенін мәлімдеді. Сонымен қатар ведомство Таиланд құқық қорғау органдарының жарылыстың қайталану қаупінің сақталынуы туралы ескертуін назарға алуға шақырып отыр. Және Бангкоктағы Қазақстан азаматтарына қаланың орталық аудандарына, адамдар көп жиналатын орындарға уақытша бармауға кеңес береді.
