Assalomu alaykum! Azizlar, Alisher Navoiy nomidagi O‘zbekiston Milliy kutubxonasi yangi – «Salom, Kitob!» loyihasiga qo‘l urdi.
Har birimiz - kattayu kichik kun davomida beixtiyor, hattoki o‘zimiz ahamiyat bermagan holda ko‘p marta kitobga murojaat qilamiz - atrofimizda ko‘ramiz, qo‘limizga olamiz, qo‘yamiz, yana olamiz... Ha, shunday, chunki ehtiyoj bor. E’tibor bering-a: kitobning sehrli qudrati ila albatta kitob yuzini asta silab, avaylab ochamiz, keyin yana va yana sahifalari ichra xuddi sho‘ng‘ib boramiz! Satrlardan ko‘zimiz o‘tar ekan, kitob go‘yo «Salom!» deyayotganday tuyuladi. Biz ham alik o‘rnida mutolaaga kirishaveramiz...
Bilim ummoni uzra dunyo kashfiyotlaridan hayratlanganimiz sari zakovatli Hazrati Insonga ta’zim aylaymiz. Shunday ekan, xabarchimiz - kitobni ham Hazrati Kitob deyishga haqlimiz!..
Loyihamizning ilk sahifasi g‘azallari, nasrlari zamonlar osha, asrlar osha quloch yoyib, dunyo bo‘ylab kezayotgan ikki daho o‘zbegim o‘g‘loni - Alisher Navoiy va Zahiriddin Bobur tavallud sanalari hamda bu buyuk siymolarni besh yuz yil o‘tib, XX-XXI asrlarda tadqiq etib, targ‘ib etishga salmoqli hissa qo‘shgan o‘zbegimning suyukli bekasi O‘zbekiston Qahramoni Suyima G‘aniyeva tavalludlarining 90 yilligiga bag‘ishlanadi!
...Alisher Navoiy nomidagi O‘zbekiston Milliy kutubxonasida hozirlangan studiya davrasi astalik bilan kengayib bormoqda... Navoiyshunoslar, boburshunoslar, jurnalistlar, Ustozoda-olima Suyima G‘aniyevaning safdoshlari, izdoshlari, do‘stlari tashrif buyurishmoqda...
Azizlar, e’tiboringizga «Suyima G‘aniyeva. Muntazamlik» sarlavhasi ostida buyuk olima tavalludining qutlug‘ sanasiga bag‘ishlangan nafis suhbatlar davrasini havola etamiz. Shuni ham eslatib o‘tamizki, olima haqida xotiralar to‘planmoqda va albatta bari yaxlit kitobga muxrlanadi. Demoqchi bo‘lganimiz, Sizning ham esdaliklaringizni kutib qolamiz.
Ko‘rsatuv davomida Suyima G‘aniyeva hayoti va ijodiga bag‘ishlangan «Yo‘l» hujjatli filmi muallif Eshqobil Shukurov ruxsati bilan namoyish etilib borildi..
![](https://i.ytimg.com/vi/05Vz9MXWR9Q/mqdefault.jpg)