БҰҰ-ың Бас хатшысы Антониу Гутерриш Кабулдағы «Интерконтиненталь» жасалған шабуылды қатаң сынға алып, қаза тапқандардың жақындарына көңіл айтып, жараланғандардың тез сауығып кетуін тіледі. Ал БҰҰ Бас хатшысының Ауғанстан ісі бойынша арнайы өкілі Тадамичи Ямамото өз кезегінде бұл қарулы шабуыл әскери қылмыс болуы мүмкін деп отыр.
Естеріңізге сала кетейін, террористер қонақүйге сенбінің кешінде шабуыл жасаған. Ауғанстан билігі мәлімдегендей, ұзаққа созылған арнайы операцияның нәтижесінде экстримистердің көзі жойылды. Соңғы деректер бойынша, теракт салдарынан 18 адам көз жұмды. Алайда қазақ тапқандардың саны 40-қа жетуі мүмкін деген ақпар бар.
Бұл шабуылды «Талибан» террористік ұйымы өз мойынына алып отыр. Айта кетейік, Кабулдағы шабуыл салдарынан қаза болғандардың ішінде Қазақстан азаматы бар. Бұл туралы ҚР Сыртқы істер министрлігінің баспасөз хатшысы Әнуар Жайнақов өзінің Facebook парақшасында хабарлады. «Ауғанстаннан қазалы хабар келді. 1978 жылғы Қазақстан азаматы Ауғанстан астанасы Кабулдағы Inter-continental қонақүйінде болған шабуыл кезінде қаза тапты. Жақындары мен туған-туыстарына қайғырып көңіл айтамыз. Қазақстан дипломаттары Ауғанстанның қорғаныс қызметімен және Сыртқы істер министрлігімен байланыс орнатуда. Жақын күндері марқұмның денесін елге жеткізу мәселесі шешілетін болады», – делінген хабарламада.
![](https://i.ytimg.com/vi/0CJSwvaETcU/mqdefault.jpg)