Հոկտեմբերի 2-ին, ժամը 11.52-ին, ոստիկանության ՕԿԿ ահազանգած քաղաքացին գողության մասին հաղորդում տվեց. տեխնիկական միջոցների գործադրմամբ բացել էին Վերին Անտառային փողոցում գործող սննդի կետի պահեստային դուռը, գողացել չհրկիզվող պահարանը, նաև՝ դրամարկղում եղած 200 000 դրամը։
Կենտրոնականի բաժնի քրեական հետախույզների համակողմանի աշխատանքի շնորհիվ հանցագործությունը բացահայտվեց թարմ հետքերով։ Ստացվեց տեղեկություն, որ գողությունը կատարել է 29-ամյա մի երիտասարդ։ Նույն օրը նա ձերբակալվեց ու տեղափոխվեց Կենտրոնական բաժին։
Մինչ միջոցառումները շարունակվում էին, ոստիկանության Կենտրոնական բաժնում ստացվեց նմանատիպ մեկ այլ հաղորդում։ Քաղաքացին հայտնում էր, որ գիշերը տեխնիկական միջոցների գործադրմամբ փորձել էին բացել Կոնդի իր տան դուռը, սակայն իրենց կամքից անկախ հանցագործությունն ավարտին չէին հասցրել՝ դուռը չէր բացվել։
Ձեռագիրը նույնն էր, և Կենտրոնականի քրեական հետախույզների կասկածը, որ դա ևս 29-ամյա երիտասարդի ձեռքի գործն էր, հաստատվեց։
Կազմված փաստաթղթերն ուղարկվել են քննչական բաժին։ Հանգամանքները պարզվում են։
