«Ռուսերենը շարունակում է լինել պահանջված»
29.05.2014
Այսօր Մանկավարժական համալսարանում հյուրընկալվել էր Հայաստանում ՌԴ դեսպան Իվան Վոլինկինը՝ բուհի ռեկտորի, պրոռեկտորների, ռուսական բաժնի պրոֆեսորադասախոսական կազմի և ուսանողների հետ քննարկելու հանրապետությունում ռուսերենի դասավանդման հիմնախնդիրները, ինչպես նաև ուրվագծելու համագործակցության նոր եզրեր:
Ռեկտոր Ռուբեն Միրզախանյանը ներկայացրեց համալսարանում ռուսաց լեզվի ամբիոնի գործունեությունը՝ ընդգծելով, որ բոլոր մասնագիտությունների գծով ուսումնական պլաններում ավելացվել են ռուսերենի դասաժամերը. «Ի թիվս ռուսական բաժիններ ունեցող այլ համալսարանների՝ Մանկավարժական համալսարանն ունի մի առանձնահատկություն. առկա և հեռակա բաժինների դիմորդների հիմնական մասը Հայաստանի մարզերից են և ուսումն ավարտելուց հետո նրանք վերադառնում են մարզեր և ձեռնամուխ լինում ռուսերենի դասավանդմանն ու տարածմանը»:
Օտար լեզուների ֆակուլտետի դեկան Տիգրան Միքայելյանը,Արտասահմանյան գրականության ամբիոնի վարիչ, պրոֆեոր Ռուզան Թադևոսյանը, Օտար լեզուների դասավանդման մեթոդիկայի ամբիոնի վարիչ Մելանյա Աստվածատրյանն ու նույն ամբիոնի պրոֆեսոր Բելլա Եսաջանյանը վստահեցրին՝ ռուսերենը Հայաստանում մայրենիից հետո առաջին պարտադիր լեզուն է և արվում է ամեն ինչ այն կենդանի պահելու համար:
Իվան Վոլինկինը կարևորեց բուհի պրոֆեսորադասախոսական կազմի հետ հանդիպումը՝ միաժամանակ չթաքցնելով իր հիացմունքը Մանկավարժական համալսարանում ռուսաց լեզվի և նրա դասավանդման մեթոդիկայի մակարդակի հանդեպ. «Ներկա ժամանակներում շատ կարևոր է երիտասարդներին փոխանցել հայ և ռուս ժողովուրդների միջև եղած դարավոր բարեկամական հարաբերությունները: Շատերը պնդում են՝ ռուսերենը Հայաստանում վերացել է, սակայն ես այդ կարծիքին չեմ. այն շարունակում է լինել պահանջված»,-նշեց դեսպանը՝ վստահեցնելով, որ իր աշխատանքային գերակա ուղղություններից մեկն էլ հենց դա է՝ փնտրել և գտնել համագործակցության նոր եզրեր ու ծրագրեր:
Հանդիպման ընթացքում դասախոսները դեսպանին ներկայացրին ոլորտում առկա խնդիրները և առաջարկեցին լուծման իրենց տարբերակները. մասնավորապես, Հայաստանում հիմնել ռոսական բազային դպրոց, համատեղ մշակել ուսանողների փոխանակման ծրագրեր, ստեղծել ռուսական գրական ստեղծագործությունների էլեկտրոնային տարբերակներ և այլն:
Հանդիպման ավարտին ՌԴ դեսպան Իվան Վոլինկինը շնորհավորեց ներկաներին Մայիսի 28-ի՝ Հայաստանի Առաջին հանրապետության տոնի առթիվ և բարեմաղթանքների հետ մեկտեղ հույս հայտնեց, որ Մանկավարժական համալսարանի ռուսական բաժնի շրջանավարտներն իրենց ապագան պատկերացնում են ռուսաց լեզվի և գրականության դասավանդման խորն ու համապարփակ ըմբռնմամբ:
ՀՊՄՀ ռեկտոր Ռուբեն Միրզախանյանը դեսպանին շնորհեց «Մանկավարժական համալսարան» մեդալ՝ ի նշան հարգանքի և բուհում ռուսաց լեզվի և գրականության ուսումնասիրման, ռուսերենի ուսուցիչների պատրաստման կարևորության:
