ནས་འབྲུ་སྔོན་མོའི་འཁྲུངས་ས། དགའ་ས་ལེགས་འོ།
མགོ་ནག་བོད་ཀྱི་ཕ་ས། སྐྱིད་ས་ལེགས་འོ།
དགའ་ས་ལེགས་འོ། སྐྱིད་ས་ལེགས་འོ།
དགའ་ས་ལེགས་འོ། སྐྱིད་ས་ལེགས་འོ།
སྦྲང་དཀར་རྩམ་པའི་དྲི་ཞིམ། དགའ་ས་ལེགས་འོ།
གངས་ཅན་བོད་པའི་ཐུགས་རྒྱུད། སྐྱིད་ས་ལེགས་འོ།
དགའ་ས་ལེགས་འོ། སྐྱིད་ས་ལེགས་འོ།
དགའ་ས་ལེགས་འོ། སྐྱིད་ས་ལེགས་འོ།
ཡ་་་་་་།
སྔོན་བསྐལ་བ་ཆགས་པའི་དུས་སྐལ་ལ།།
སྟོད་ཡར་ཀླུངས་ཟོ་ཐང་ཡངས་པོ་ནས།།
བཟའ་ནས་འབྲུ་སྔོན་མོའི་ཞིང་ཞིག་བཏབ།།
ནས་སྔོན་མོས་སྦྲང་དཀར་རྩམ་པ་གནང་།།
བོད་ཆོལ་གསུམ་འཚོ་བའི་བརྟེན་ཕུར་ནི།།
ནས་སྔོན་མོའི་ཉིང་བཅུད་འདི་ཡིས་བྱས།།
ཡ་་་་་་།
ཟས་ཞིམ་པོ་སྦྲང་དཀར་རྩམ་པ་འདིས།།
བོད་མཐའ་བཞིའི་རྒྱལ་ཁམས་སྐྱོངས་དུས་ན།།
དམག་བུ་རྟའི་གྲངས་ཀ་འཕེལ་དུ་བཅུག།
གནས་ཤེས་བྱའི་སྐྱེད་ཚལ་འགྲིམས་དུས་ན།།
བློ་རྣམ་དཔྱོད་རིག་པ་རྒྱས་སུ་བཅུག།
དགོས་གངས་ཅན་བོད་ལ་བདེ་སྐྱིད་བསྐྲུན།།
ཡ་་་་་་།
ཟས་ཀྱི་དྭངས་མ་སྦྲང་དཀར་ཟས་མཆོག་འདི།།
འབྱུང་བཞི་ནད་ཀྱི་གཉེན་པོ་དང་།།
ལུས་ཀྱི་སྟོབས་སྐྱེད་སྨན་དང་མཚུངས།།
མགོ་ནག་བོད་པ་བསོད་ནམས་ཅན།།
ཟས་མཆོག་འདི་དང་འབྲལ་མེད་ཤོག།
ལོངས་སྤྱོད་ཕུན་སུམ་རྒྱས་པར་ཤོག།
བཀྲ་ཤིས་ཕྱྭ་གཡང་རྒྱས་རྒྱུར་ཅིག།
ཡར་ཀླུངས་ཟོ་ཐང་ཞིང་གི་ནས་འབྲུ་སྔོན་མོར་གཤོག་པ་མེད་དེ་གཤོག་པ་ཡོད།
འདབ་གཤོག་དཀར་པོ་གངས་ཀྱི་ར་བས་བསྐོར་བའི་ཡུལ་གྲུ་ཀུན་ལ་བརྐྱངས་ཏེ་
ཆོལ་ཁ་ཡོངས་ལ་སེར་པོ་གསེར་གྱི་སྐེད་རགས་བཅིངས།
ནས་འབྲུ་གཤོག་ཐོགས་དེ་ཚོ་ཉི་མའི་པང་ནས་ཐོར་བའི་ཡི་གེའི་ཕྲེང་བ་སྟེ།
རྩེད་ཐང་གོང་པོ་རི་ནས་ཕྱོགས་བཞིར་མཆེད་པའི་མི་རིགས་འདི་ཡི་ཤེས་རིག་
འོད་ཀྱི་ལོ་རྒྱུས་འཛམ་བུ་གླིང་གི་གཙུག་ཏུ་འབྲི་རོགས་མཛད།
མགོ་ནག་རྩམ་ཟན་བོད་པ་ཚོ།
ནས་འབྲུ་གཤོག་ཐོགས་གངས་ཀྱི་རྨི་ལམ་ཡིན་ལ་གངས་ཅན་བོད་མིའི་ལྷ་སྐལ་ཡིན།
ནས་འབྲུ་གཤོག་ཐོགས་དེ་ཚོ་ལྷ་ཡི་ཕོ་ཉ་ཡིན་ལ་མི་སེམས་དཀར་པོའི་འོད་སྣང་ཡིན།
ནས་འབྲུ་གཤོག་ཐོགས་འཕུར་བའི་ས་ལ་སྦྲང་དཀར་རྩམ་པའི་དྲི་ཞིམ་མཆེད་ཅིང་
སྨུག་པོ་མི་ཡི་རིགས་རྒྱུད་འཕེལ།
ནས་འབྲུ་གཤོག་ཐོགས་བབས་པའི་སྦྲང་དཀར་རྩམ་པའི་དྲི་ཞིམ་འཐུལ་ཞིང་
མི་སེམས་དཀར་པོ་ཆོས་སུ་ཕྱོགས།
ནས་འབྲུ་སྔོན་མོའི་འཁྲུངས་ས་འཁྲུངས་ས།
དགའ་ས་དགའ་ས་ལེགས་འོ།
མགོ་ནག་བོད་ཀྱི་ཕ་ས། སྐྱིད་ས་སྐྱིད་ས་ལེགས་འོ།
སྦྲང་དཀར་རྩམ་པའི་དྲི་ཞིམ། དགའ་ས་དགའ་ས་ལེགས་འོ།
ནས་འབྲུ་སྔོན་མོའི་འཁྲུངས་ས། དགའ་ས་ལེགས་འོ།
ནས་འབྲུ་སྔོན་མོ་རྡོག་གཅིག་ཡིན་ན་ཆོག་པའི་ང་དང་ང་དག་ཀྱང་།
མགོ་ནག་རྩམ་ཟན་གངས་ཅན་བོད་པའི་རྒྱུད་པའི་རྒྱུད་པ་ཕྱི་མ་སྡེ།
ཕ་ཡུལ་ཁ་ཐག་བཀྱེད་ཅིང་འབྲུ་མར་སེར་པོར་རྒྱང་ཐག་རིང་ལ་
འོ་ཞོ་ལྷད་མེད་མྱོང་བ་ཉིན་རེ་བཞིན་དུ་ཇེ་དཀའ་ཇེ་དཀའ་ཡིན་ན་ཡང་།
ལུས་ཀྱི་ཆ་ལུགས་བརྗེས་ཤིང་ངག་གི་སྨྲ་ལྕེ་ལྐུགས་ལ་སེམས་པས་
རང་ལྕོགས་མ་ཐུབ་ཉིན་རེ་བཞིན་དུ་ཇེ་ཐུ་ཇེ་ཐུ་ཡིན་ན་ཡང་།
ནས་འབྲ་སྔོན་མོའི་བྱུང་བ་མ་བརྗེད་ཡིད་ལ་ཟུངས་དང་ཟེར་ན་འདོད།
སྦྲང་དཀར་རྩམ་པའི་བཀའ་དྲིན་མ་བརྗེད་ཡིད་ལ་ཟུངས་དང་ཟེར་ན་འདོད།
ནས་འབྲུ་སྔོན་མོའི་འཁྲུངས་ས། དགའ་ས་ལེགས་འོ།
མགོ་ནག་བོད་ཀྱི་ཕ་ས། སྐྱིད་ས་ལེགས་འོ།
དགའ་ས་ལེགས་འོ། སྐྱིད་ས་ལེགས་འོ།
དགའ་ས་ལེགས་འོ། སྐྱིད་ས་ལེགས་འོ།
སྦྲང་དཀར་རྩམ་པའི་དྲི་ཞིམ། དགའ་ས་ལེགས་འོ།
གངས་ཅན་བོད་པའི་ཐུགས་རྒྱུད། སྐྱིད་ས་ལེགས་འོ།
དགའ་ས་ལེགས་འོ། སྐྱིད་ས་ལེགས་འོ།
དགའ་ས་ལེགས་འོ། སྐྱིད་ས་ལེགས་འོ། #tibetansong #tibetanmusic #tibetansong2022
![](https://s2.save4k.ru/pic/18tSbG47eYc/maxresdefault.jpg)