Հունիսի 14-ին Արթիկի Դանիել Ղազարյանի անվան երաժշտական դպրոցի դահլիճում տեղի ունեցավ երաժշտական դպրոցի 2018-2019 ուսումնական տարվա հաշվետու համերգը։ Դպրոցի բոլոր բաժինների տարբեր դասարանների սաները հանդես եկան հայ և արտասահմանյան աշխարահռչակ դասականների ստեղծագործություններով, դաշնամուրային, լարային գործիքների, ինչպես նաև՝ վոկալ ևերգչախմբային կատարումներով՝ ներկաներին կտրելով իրականությունից` տարան երգի, երաժշտության հրաշալի աշխարհ: Միջոցառմանը ներկա էին Արթիկի համայնքապետարանի աշխատակիցներ, ծնողներ և երաժշտասերներ։
Համերգի ավարտին դպրոցի տնօրեն Վահիդա Կարախանյանը շնորհակալություն հայտնեց դպրոցի սաներին, ուսուցիչներին՝ ձեռք բերած հաջողությունների համար, և պատվոգրեր հանձնեց դասատուներին և լավագույն սաներին: Ընթացիկ տարում Արթիկի երաժշտական դպրոցի սաները մասնակցել էին տարբեր փառատոների և մրցույթների, արժանացել պատվավոր մրցանակների: Տարեվերջյան հաշվետու համերգը սաների համար ոչ միայն բեմ բարձրանալու ևս մեկ լավ առիթ է, այլև հնարավորություն՝ ծնողներին ներկայացնելու տարվա ընթացքում ձեռք բերած հմտությունները:
