Aslan Aşiq - "Xocalı". Şeir Xocalı şəhidlərinin əziz xatirəsinə həsr olunur...

Qalmışıq gör neçə ildir sənə həsrət, Xocalı?!
Calanır ildən-ilə möhnətə möhnət, Xocalı.

Sən bizim tarixə qanla yazılan yaddaşımız,
Adımız qanla yazılmış qayalar başdaşımız.
Sən bizim dərd ilə hər gün süzülən göz yaşımız,
Gözümüz yaşlı qalıb gör neçə müddət, Xocalı.

O gecə canlı təbiət verə bilmirdi qərar,
Görmüşük qar ağ olar, yağdı sənə “qırmızı qar”.
Sən ümidlə yaşadın ki, gələcək fəsli-bahar,
Çox təəssüf, sənə yaz olmadı qismət, Xocalı.

Faciən xalqımızın köksünə dağ çəkdi yaman,
Olunan vəhşətə donmazmı damarlardakı qan?!
Nə qədər qız-gəlinin düşdü əsir, Allah aman!
Yaşayıbsan o gecə sən necə dəhşət, Xocalı?!

Neçə məzlum ananın qəlbinə qəm doldu o gün,
Göz önündə balalar dərdə düçar oldu o gün.
Üzü gül körpələrin çöhrələri soldu o gün,
Ərşə yetməzmi bu vəhşət, bu müsibət, Xocalı?!

Xalqımız heç vaxt unutmaz igid əcdadlarını,
Vətən uğrunda canından keçən övladlarını.
Doğulan körpələrə qoydu şəhid adlarını,
Ki, yaşatsın həmişə düşmənə nifrət, Xocalı.

© Aslan Aşiq

свернуть