Ageze mu gahinda ka YIHANDE.

Uyu mugani bawuca iyo babonye umuntu uri mu kaga yabuze epfo na ruguru, nibwo bagira bati: “ Ageze mu Gahinda ka Yihande!” Waturutse kuri Yihande se wabo wa Cyirima I Rugwe wari utuye mu mpinga ya Gitima ho mu (Rutobwe-Gitarama), ahagana mu mwaka w’I 1300.
Ubwo Nkurukumbi, nyirarume wa Ruganzu Bwimba yamaze gutinyirira ingoma avuga ko yazanye amagara, Ruganzu ararakara atabara bucengeri mu Gisaka igitaraganya nta mana zimubereye umutabazi, ari byo byavuyemo umugani ngo: “umusindi yarenze akarwa”. Nibyo Ruganzu yasubije intumwa ya nyina, amutumyeho ngo nagaruke hatabare nyirarume. Noneho ati: “Genda ubwire uwo mukobwa w’umusingakazi, uti: “Umusindi yarenze akarwa”.
Ni nayo nkomoko yo kudasubira ku ngoma kw’Abasinga babyaranaga abami n’abanyiginya, byaturutse kuri Ruganzu Bwimba watabaye ari umubira cyangwa se (atarabyara), kuko icyo gihe umugore we yari atwite inda y’uburiza ari yo yabyayemo Cyirima Rugwe.
Ubwo Nkurukumbi yabanaga n’umwana yareraga w’umunyiginya we akaba (Umusindi) witwaga Yihande. Ariko Ruganzu yatabaye Yihande amaze kuba umusore, kuko bari baravukiye rimwe. Ajya gutabara bucengeri, yasize araze se wabo Cyenge yuko abasinga batazasubira ku ngoma, amuraga n’uko umwana we uzavuka batazamuha ubwami, ati: “Ngwino dutabarire ingoma yacu”. Nkurukumbi aramubwira ati: “Ikingakinge akenda wowe usigare”. Niyo mvano y’umugani wamamaye mu Rwanda ngo: “ umunyiginya mutindi atinyirira ingoma ari iyabo”. Byakomotse kuri Yihande wanze gutabarana na Ruganzu Bucengeri kandi bava inda imwe.
Nuko Ruganzu amaze gutabara Bucengeri, agwa mu Gisaka. Ingoma y’U Rwanda isigaranwa na se wabo Cyenge. Rugwe mwene Ruganzu amaze kuba ingaragu, abahigi bajyana na se wabo Cyenge guhiga, bica impongo, bayigira impaka, umwe ati:”Ninjye wayishe”. undi ati: Ni iyanjye”. Baraza baburanira Cyenge n’abatware, birabayobera.
Ubwo baburanaga Rugwe ahari. Cyenge n’abatware be baraceceka, babuze uko baca urwo rubanza. Nibwo Rugwe abajije Cyenge n’abatware, ati: “Mbese habuze umugabo n’umwe ngo abakize?” Abiru bararebana, bati: “Umwana yakuze ubwo amaze kumenya guca urubanza, akwiye kwimikwa”. Mbere Rugwe atarabaza umugabo wari uhari, ntibyavugwaga, ababuranaga ntibabakaga abagabo. Zana umugabo wari uhari byatangijwe na Rugwe. Ibi twabibonye mu ntangiriro z’iki kiganiro.
Ubwo Ijambo Ruganzu yabwiraga se wabo Cyenge yuko atazamuhera umwana ubwami ari we uzabwiha riba riruzuye. Rugwe amaze kwima, bamubwira abantu bahemukiye se ajya gutabara Bucengeri: Bamubwiramo Yihande wo mu Rutobwe za (Gitarama), Rugwe amaze kubyumva anyaga Yihande, abuza abajya kumusura, amubuza no kujya kuvoma. Yihande agwa mu mpinga ya Gitarama n’uruhato.
Nibwo bahise agahinda ka Yihande. Hanyuma ariko babivanyeho ku ngoma ya Rwabugiri ku mpamvu z’imiterekero, bahita mu mpinga ya Gitima, kugira ngo umuzimu wa Yihande acogore. Ariko rubanda ntibareka kubivuga, kugeza n’ubu, ni yo mpamvu, iyo babonye umuntu ubabaye cyane, yabuze epfo na ruguru bagira bati:” yajyagayo kwenda iki, ko ari mu Gahinda ka Yihande.
Kuva ubwo Kugera mu Gahinda ka Yihande, bivugwa ko ari kubura epfo na ruguru, ntugire icyo wiyambaza, mbese bikaba ibibazo uruhuri. Nkuko Rugwe yafungiye buri kimwe Yihande akamubuza no kuvoma amazi, ubwo yari amaze kumenya ko ari umwe mu bantu bahemukiye se Ruganzu Bwimba igihe yajyaga gutabara bucengeri.
Ubwo Rugwe atangira urugendo rwo gutwara igihugu, nk’uko yari amaze kukiha, dore ko se yari yaranze ko hazagira umuha u bwami, icyo yavugaga ni uko umuhungu we yagombaga kwiha ingoma.
Muri iyi nsigamigani humvikanamo amateka agaruka kuri Ruganzu bwimba, wemeye kuba umucengeri ngo atabarire ingoma. Ubucengeri bwo mu Rwanda rwa kera, kuri ubu wabugereranya n’ubutasi, bikaba byarakorwaga igihe igihugu cyabaga kigiye gutera ikindi, mbere yo gutera igihugu cyangwa se ubwami bwoherezaga umuntu ugomba kujyayo, akaneka amakuru y’aho bagiye gutera, akamenya imiterere y’igihugu, ingabo gifite, umucengeri akamenya aho bafite imbaraga n’intege nke.
Mu kwirinda ko ibintu bigera mu gahinda nk’aka Yihande, nta muntu ukwiye gutererana abandi igihe bahuriye mu gikorwa kibahuje bose biteza imbere.
Ndamutse mfashe urugero rw’urugendo rw’iterambere ry’u Rwanda rwahereye mu mwaka wa 2000, hakorwa ibikorwa byibandaga cyane cyane ku gusana ibyari byarasenyutse. Mu ntangiriro z’umwaka wa 2000 hateguwe Icyerekezo 2020 cyatangaga ishusho y’uko u Rwanda rushya rwari rukataje rugana ku byo rwifuzaga kugeraho mu iterambere mu rwego rw’ubukungu, ibyo bikorwa byose abanyarwanda babigizemo uruhare nta numwe usigaye inyuma, iterambere rigenda rizamuka.
Mu myaka icumi yakurikiyeho ubwo hari mu mwaka wa 2010 icyerekezo cyibandaga ku bikorwa byo kubaka umusingi w’iterambere rirambye hakorwa ishoramari mu bijyanye no kongera ubushobozi bw’abantu, ...

свернуть