Prezident İlham Əliyevin tapşırığına uyğun olaraq mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir. Bu gün Dövlət Gömrük Komitəsinin sədri Aydın Əliyev Xızıda, bu rayondan, eləcə də Sumqayıt şəhəri, Qobustan və Abşerondan olan vətəndaşları qəbul edib. Vətəndaşların müraciətlərinin əksəriyyəti işə qəbul, gömrük keçid məntəqələrinin vəziyyəti, malların idxal-ixracı və bununla əlaqədar sənədləşmə qaydaları ilə bağlı olub. Səyyar qəbul zamanı Dövlət Gömrük Komitəsinin sədri hər bir vətəndaşın müraciətini diqqətlə dinləyib və qaldırılan məsələlərin qanunvericiliyə uyğun həlli barədə müvafiq strukturların rəhbərlərinə tapşırıqlarını verib. Vətəndaşların qəbul zamanı qaldırdıqları məsələlərin bir qismi yerindəcə həll olunub. Dövlət Gömrük Komitəsinin səlahiyyətlərinə aid olmayan məsələlərlə bağlı müraciətlər isə müvafiq orqanlara çatdırılmaq üçün qeydiyyata alınıb.

свернуть