Կամերային երաժշտության տանը հունիսի 15-22-ը` 8 օր շարունակ, Նարեկացի արվեստների փառատոնը ներկայացնում է հոգևոր, ժողովրդական, դասական ստեղծագործություններ:
«Նարեկացի» արվեստի միության հիմնադիր Նարեկ Հարությունյանն ասում է, որ այս միջոցառումը ներկայացնում է բացառապես Հայաստանում ապրող, ստեղծագործող, դժվարություններ հաղթահարող ու մաքառող արվեստագետներին: Նորաստեղծ արվեստների փառատոնը այս համերգաշրջանի օրերին նախատեսել է նաև ջազ ու ավանդական երգի, պարի համերգներ. «Կարին» երգի, պարի խումբ, Վահան Արծրունի` «Շողակաթ» երգչախմբի, «Վարդանյան» քառյակի ու այլ մենակատարների հետ, Վահագն Հայրապետյան, Արմեն Հյուսնունց` ջազային իմպրովիզացիաներ և այլն: Փառատոնի օրերին Կամերային երաժշտության տանը ցուցադրվում են Հակոբ Հակոբյանի, Վարդան Թովմասյանի, Շոթա Ոսկանյանի, Արմեն Խոջոյանի ու այլ նկարիչների գործեր: Առաջին անգամ Նարեկ Հարությունյանը ներկայացրեց իր լուսանկարները` «Ֆոտոաուրա» խորագրով: Նարեկացի արվեստների փառատոնի մեկնարկն օրհնեց հոգևոր դասը` Տ. Վարդան վարդապետ Նավասարդյանի գլխավորությամբ:
