Жарты ғасырға жуық адам өміріне аса қауіпті ядролық сынақ өткізілген Семей полигонының жабылған күні. Осы қасіретті кезеңді Астанаға жиналған әлемнің белді саясаткерлері, қоғам белсенділері, экономистері еске алды.
Ресми деректерге сүйенсек, атом бомбасы сынағынан елімізде жарты миллионға жуық адам зардап шеккен. Ал оның қасіретін бірнеше толқын әлі де сезініп келеді.
Бір кездегі үрей даласы ендігі де бейбітшіліктің жаһандық бастамалар бесігіне айналды. Қазақ елі адамзат баласын қаһарлы қарудан бір жолата бас тартып, бір мақсатқа жұмылдыруда аянбай еңбек етіп келеді.
Биыл Астанада бейбітшілік саммиті өтетін болады. Қараша айында өткізілетін бас қосуда әлемнің ірі державалары мен жаңа халықаралық ұйымдар арасындағы қарым-қатынасты реттеудің жаңа тетіктері талқыланатын болады.
29 тамыз. Адамзат тарихындағы айтулы күн. Осыдан тура 25 жыл бұрын Қазақстан жаһандағы ең ірі Семей полигонын жапты. Төртінші ядролық арсеналдан өз еркімен бас тартты.
Тарихи шешім. Ел біледі, әлем мойындайды. Сондықтан мерейлі датаны елеп келгендер көп. Олар ядролық қарудан ада әлем құруға күш салуға ниетті.
Конференцияның атауы да сол. Ядролық қарусыз әлем десеңіз – бірден Қазақстан елестейтіні хақ. Себебі адамзат қауіпсіздігіне өлшеусіз үлес қосты. Демек, бұл жиынның Қазақ елінде өтуі – заңды.
Нұрсұлтан Назарбаев, Қазақстан Республикасының Президенті
-Халқымыз Тәуелсіздік таңы атар сәтте бейбітшілік жолын таңдайтынын барша әлемге паш етті. Бұл Қазақстанның жаһандық қауіпсіздік көшін бастаған теңдессіз қадамдарының бастауы болды. Біздің бейбіт бастамаларымыздың бәрі де әлем қауымдастығының жаппай қолдауына ие болуда. Соның нәтижесінде Қазақстан жаһандық ядролық қарусыз әлем қозғалысының көшбасшысына айналды.
