6-cı Qlobal Bakı Forumu çərçivəsində Beynəlxalq Kitab Sammiti keçirildi. Sammit milli inkişafda, mədəni irsin qorunmasında və gələcək nəsillərə ötürülməsində kitabın əhəmiyyəti, eləcə də milli kitabxanaların rolu, kitabxanaların gələcəyi mövzusuna həsr olunub. Məqsəd milli-mədəni kimliyin və insan sivilizasiyasının qorunmasında kitabın və kitabxanaların rolunu vurğulamaqdır. Tədbirdə Rumıniya ilə Azərbaycanın Milli kitabxanaları arasındakı əməkdaşlıqdan bəhs edən Rumıniya Baş nazirinin müavini Ana Birçall tezliklə ölkəsində Azərbaycan Mərkəzinin açılacağını bildirdi. O, həmçinin gənclərə kitab sevgisinin aşılanmasının vacibliyini vurğuladı.
Kitabxana Assosiasiyaları və İnstitutları Beynəlxalq Federasiyasının sabiq prezidenti İnqrid Parent də kitabxanaların rolunu xüsusi vurğuladı. O, kitabların insanlara daha humanist olmaqda kömək etdiyini bildirdi.
Mirzə Fətəli Axundov adına Azərbaycan Milli Kitabxanasının direktoru Tahir Kərimovun sözlərinə görə, sammit çərçivəsində San-Fransiskodakı internet arxiv kitabxanası ilə gələcək əməkdaşlığın perspektivləri müəyyənləşdirilib. Azərbaycan artıq həmin kitabxananın internet resurslarından bəhrələnə biləcək. Direktor əlavə etdi ki, bu ilin dekabrında Bolqarıstan ilə qarşılıqı əməkdaşlıq haqqında müqavilənin imzalanması nəzərdə tutulur.
Qeyd edək ki, Sammit Amerika Birləşmiş Ştatları Konqres Kitabxanası və Misirin İsgəndəriyyə Kitabxanasının birgə təşəbbüsü ilə 2012-ci ildən keçirilir. İndiyədək bu ali tədbir Vaşinqton, Sinqapur, Paris və İsgəndəriyyə kimi dünya mədəniyyətinə qlobal təsiri olan şəhərlərdə təşkil edilib.
