Күн райының күрт бұзылуынан Қарағанды облысында барлық бағыттағы жолдар жабылды. Осының салдарынан Теміртаудың тұсында 4-5 шақырымға созылған көлік кептелісі пайда болған.

Шамамен 300-ге жуық көлік кешелі-бері жол бойында қаңтарылып тұр. Түні бойы толассыз жауған қалың қардың соңы ақтүтек боранға ұласты.

Бір тәулікке жуық далада жатқан жүргізушілер мен жолаушылар жақын маңдағы дәмханадан жүрек жалғап, жан сақтаған. Алайда олардың өзі осы жағдайды пайдаланып, тамақ құнын шарықтатып жіберіпті.

Әнуар Үдешов, көлік жүргізуші

-Жел мына жақтан, мына жердің барлығын қар алады. Ал егер де МАИ қызметкерлері кішкене сооброжайтетіп, сопровождайтетіп, встречкамен алып кетсе, біз баяғыда Астанада болатын едік. Ал біз мына жерде тұрмыз. Болмаса жолды Қарағандыдан жабу керек еді. Алды да Теміртаудан әкеліп жапты. Мына жерде забор бар, обратно разворот жасайын десе адамдар өте алмайды.

Сағат Шегеров, көлік жүргізуші

-Тамақты кеше ішкеннен осы жерде жүрміз ғой. 112 звондасаң: «Бәрін жібереді», – дейді. Қайдағы жіберген, телефонға жауап бермейді. Звондасақ алмайды.

Біздің түсіру тобымыз барысымен, жол сақшылары жолды ашып, жолаушылар Осакаров елді мекеніне дейін сапарларын жалғастырды.

Ал Шығыс Қазақстанда соңғы екі тәулікте күн райы тағы күрт бұзылды. Қарлы дауыл соғуына байланысты Семейдегі мектептерде екінші ауысымда оқитын сыныптар үшін сабақ тоқтатылды. 10-нан астам автокөлік жолы жабылды.

Мамандардың ескертуін елемей жолға шығып кеткен 60 адам қар құрсауында қалып қойған. Сондықтан аймақтық аэромобильді жедел құтқару жасағының мамандары демалыс күндері дамылсыз жұмыс істеді.

«Шар-Бақыршық» бағытындағы жолда қалған 16 жеңіл, 7 жүк көлігінен 51 адам Шалабай ауылына жеткізілді.

Сондай-ақ мамандар «Семей-Өскемен» және «Өскемен-Алматы» бағытындағы жолдардан 9 адамды құтқарды.

свернуть