Na zumhnak nih na nun hmanh an thlen lo ahcun van kai ding cu a hlat tuk. Ka piangthar naa ti i, na nunhlun le vawlei nuamhnak sual ah naa nuamh rih ko a si ahcun ttha tein na zumhnak na zoh tthan a hau. Hawi tuahmi tuah paoh le biaknak ah i pek sawhsawh tiang nih van an phakpi kho lai lo.
Liberal pawl hi khamh an i fian ve lo caah tuahnak in Pathian lungton an i tim ve i, an tuah khawhmi zat in thil ttha tuah an i zuam i, Bawipa lungton an i zuam ve. An tuah khawh mi zat tuah an i zuam hnu ah, midang zong kha Pulpit in an hneek ve hna. Toidor an i zuam. Thanchonnak tuah an i zuam. Mah cucu anmah tuah khawh tawk kha Bawipa vel he an fonh. Bawipa vel lawng an i rinh ngam lo caah khamhnak a tlau ee an ti. A hnu ahcun Bible hmanh zumh ngam dih ttung loin biaknak kip le tthatnak a tuahmi poahpoah van an kai lai ti tiang an zumh. Bible zeimawzat hmanh hi an thluak in an i fiang i, biaknak phung sawhsawh in an nung. Liberal cu Pathian kha an thluak in an zumh. Anmah cu chim lo, Pharisees pawl hmanh tuahsernak in van an kai lai lonak Bible ah tam tuk Jesuh nih a kan chimh.
Van kan kai le kai lai lo ding hi tuahsernak in a si lo. Mah tuahsernak pakhat hmanh a hau lo. Asinain zumhnak kan ngeih ahcun cu kan zumhnak nih cun kan nun a hruai. Phundang in piangthar cu Pathian Thlarau nih a kan hruai. Amah Pathian muikeng ding kan nun a thian ter. Sualnak chung in a kan hruai i, kan sual peng kho lo.
Zumhnak tak, zumhnak nung nih cun kan nun a thlen caah nunhlun vialte an lo i, nunning thar kha aa thok cang. Thlarau nih a kan hruai cang.
![](https://i.ytimg.com/vi/5CrMSMmyZZg/maxresdefault.jpg)