ပင်လယ်နီညွန့်ပေါင်းစစ်ဆင်ရေးကြောင့် ဟူသီသူပုန်တွေနဲ့ တင်းမာမှုတွေဖြစ်နေ
+++++++++++++
ပင်လယ်နီအတွင်း ကုန်သွယ်ရေးသင်္ဘောတွေကို ပစ်မှတ်ထားတိုက်ခိုက်နေတဲ့ အီရန်ကျောထောက်နေခံပြု ဟူသီသူပုန်တွေရဲ့ ရန်ကို ကာကွယ်ဖို့အတွက် အမေရိကန်အပါအဝင် နိုင်ငံပေါင်း 10 နိုင်ငံပါဝင်တဲ့ ညွန့်ပေါင်း စစ်ဆင်ရေးကို ဒီဇင်ဘာလ 19 ရက်နေ့က စတင်လိုက်ပါတယ်။
ယီမင်နိုင်ငံအတွင်းမှာ အခြေပြုတဲ့ ဟူသီသူပုန်တွေဟာ အစ္စရေးနဲ့ ဟားမက်စ်တို့ ဖြစ်ပွါးနေတဲ့ ဂါဇာပဋိပက္ခကို မကျေနပ်တာကြောင့် ယီမင်နိုင်ငံအတွင်းကနေ ဒုံးကျည်တွေနဲ့ ပစ်ခတ်တာ၊ ပင်လယ်နီအတွင်း ဖြတ်သန်းသွားလာနေတဲ့ ကုန်သွယ်ရေးသင်္ဘောတွေကို တိုက်ခိုက်တာ၊ ပြန်ပေးဆွဲနေတာတွေပြုလုပ်နေတာပါ။ ဟူသီသူပုန်တွေကတော့ သူတို့ဟာ အစ္စရေးနဲ့ပတ်သက်ဆက်နွယ်နေတဲ့ သင်္ဘောတွေကို ပစ်မှတ်ထားတိုက်ခိုက်မှာ ဖြစ်တယ်လို့ ထုတ်ပြန်ကြေညာထားပေမယ့် အခုချိန်ထိ အစ္စရေးနိုင်ငံနဲ့ မပက်သက်တဲ့ သင်္ဘောတွေကို ရန်ပြုနေတာကြောင့် အမေရိကန်၊ အစ္စရေး၊ ဗြိတိန်၊ ပြင်သစ်စတဲ့ နိုင်ငံကြီးတွေက ပင်လယ်နီအတွင်း စစ်ဆင်ရေးပြုလုပ်ဖို့ စီစဉ်ခဲ့တာဖြစ်ပါတယ်။
ပင်လယ်နီဟာ မြောက်အမေရိက၊ ဥရောပနဲ့ အာရှဒေသကို အဓိက ချိတ်ဆက်ထားတဲ့ ကုန်သွယ်ရေးလမ်းကြောင်း တစ်ခုဖြစ်ပြီး အဲဒီလမ်းကြောင်းပေါ်က သင်္ဘောတွေ တိုက်ခိုက်ခံရမှုတွေကြောင့် ထိပ်တန်းသင်္ဘောကုမ္ပဏီတွေဟာ ပင်လယ်နီလမ်းကြောင်းကို ပိတ်သိမ်းကြတဲ့အထိ ဖြစ်လာခဲ့တာပါ။ BP, Maersk အစရှိတဲ့ သင်္ဘောကုမ္ပဏီတွေဟာ ကုန်သွယ်ရေးလမ်းကြောင်းကို စူးအက်စ်တူးမြောင်းအစား အာဖရိကတိုက် တောင်ဘက်လမ်းကြောင်းကို ပြောင်းလဲ အသုံးပြုခဲ့ရတာကြောင့် ကုန်ကျစရိတ်တွေလည်း ပိုမိုများပြားလာခဲ့ပါတယ်။
အစ္စရေး-ဟားမက်စ်စစ်ပွဲဟာ ဒေသတွင်းတည်ငြိမ်အေးချမ်းရေးကိုပါ ခြိမ်းခြောက်လာခဲ့တဲ့အတွက် ဟူသီသူပုန်တွေနဲ့ ဟစ်ဇ်ဘိုလာစစ်သွေးကြွတွေရဲ့ ရန်ပြုမှုကို တုံ့ပြန်တိုက်ခိုက်ဖို့ အမေရိကန်၊ ဗြိတိန်၊ ဘာရိန်း၊ ကနေဒါ၊ ပြင်သစ်၊ အီတလီ၊ နယ်သာလန်၊ နော်ဝေး၊ ဆေးချီးလက်စ်၊ စပိန်နိုင်ငံတို့ ပါဝင်တဲ့ ညွန့်ပေါင်းစစ်ဆင်းရေးကို ပင်လယ်နီအတွင်း စတင်ခဲ့တာဖြစ်ပါတယ်။ စစ်ဆင်ရေးစတင်တဲ့နေ့မှာ အမေရိကန် ကာကွယ်ရေးဝန်ကြီး လွိုင်းအော်စတင်ကိုယ်တိုင် အမေရိကန်စစ်သင်္ဘောတွေဆီ လာရောက်လည်ပတ်ခဲ့တာပါ။
အဲဒီစစ်ဆင်ရေးအရ ညွန့်ပေါင်းအဖွဲ့ဟာ ပင်လယ်နီတလျှောက်နဲ့ တောင်ဘက်မှာရှိတဲ့ ဧဒင်ပင်လယ်ကွေ့တို့မှာ ကင်းလှည့်စောင့်ကြည့်သွားမှာဖြစ်ပါတယ်။ အမေရိကန်နဲ့မဟာမိတ်နိုင်ငံတွေရဲ့ ညွန့်ပေါင်းစစ်ဆင်ရေးအပေါ် မကျေနပ်တဲ့ ဟူသီသူပုန်တွေကတော့ ပင်လယ်နီအတွင်း ထိပ်တိုက်တွေ့လာခဲ့ရင် တိုက်ခိုက်သွားမယ်လို့ ထုတ်ဖော်ပြောဆိုထားပါတယ်ခင်ဗျာ။
++++++++++++
ပြည်သူတို့အတွက် ခေတ်မျက်လုံး ချန်နယ်
မြန်မာ့နိုင်ငံရေးဖြစ်စဉ်များ၊ ပြည်သူလူထုတို့၏ သိရှိလိုမှု၊ သိသင့်သည့် အမှန်တရားများကို ဖော်ထုတ်သွားမည့် ခေတ်မျက်လုံး Era'sEyes ချန်နယ်သည် ပြည်သူတို့ နှင့်အတူရပ်တည်ကာ ဘက်မလိုက်ဘဲ အမှန်တရားတို့ကို ဖော်ထုတ်တင်ဆက်သွားမှာ ဖြစ်ပါတယ်။
Subscribes ပြုလုပ်ထားခြင်းဖြင့် အားပေးကြည့်ရှုနိုင်ပါပြီ။
