EPN
မန္တလေး၊ ဖေဖော်ဝါရီ ၅ (၂၀၂၄)
မန္တလေးတိုင်းဒေသကြီး၊ ပြင်ဦးလွင်မြို့ရှိ အမျိုးသားကန်တော်ကြီး ဥယျာဉ်အတွင်း ယမန်နေ့ ဖေဖော်ဝါရီ ၄ ရက်၊ နံနက်ပိုင်းက ကျင်းပခဲ့သည့် ကျေးလက်ဒေသစက်ဘီးစီးခရီးစဥ် ၂၀၂၄ သို့ မန္တလေးတိုင်းဝန်ကြီးချုပ် ဦးမျိုးအောင် တက်ရောက်ခဲ့ကြောင်း သိရသည်။
မန္တလေးတိုင်းဝန်ကြီးချုပ် ဦးမျိုးအောင်နှင့် ဟိုတယ်ခရီး ဒု-ဝန်ကြီး ဦးဖြိုးဇော်စိုးတို့က အဖွင့်အမှာစကား ပြောကြားပြီးနောက် နံနက် ၈ နာရီတွင် စက်ဘီးစီးနင်းလိုက်ပါသူ (၃၅၀)ဦးအား တာလွတ်ပေးခဲ့သည်။
စက်ဘီးစီးအဖွဲ့သည် သတ်မှတ်လမ်းကြောင်းအတိုင်း ကန်တော်ကြီး အတွင်းပတ်လမ်း၊ ကန်တော်ကြီး အပြင်တာဘောင်နှင့် ပတ်လမ်း၊ ကန်တော်ကြီးမှမြို့ရှောင်လမ်း - ဆင်ခေါင်းလေးကျေးရွာ လမ်းဆုံအထိ၊ မြို့ရှေုာင်လမ်း၊ မန္တလေး - လားရှိုးလမ်းအတိုင်း စီးနင်း၍ ပွဲကောက်ရေတံခွန်တွင် ပြန်လည်လူစုခဲ့ကြသည်။
ပွဲကောက်ရေတံခွန်တွင် နားနေခြင်းများ၊ အမှတ်တရ ဓာတ်ပုံရိုက်ကူးခြင်း၊ ပွဲကောက်ကျေးရွာ မရောက်မီ လမ်းဘေး ဝဲ/ ယာရှိ စိုက်ခင်းများ၊ ရှု့ခင်းများတွင် ဓါတ်ပုံရိုက်ကူးခြင်း ပြုလုပ်ပြီးနောက် သတ်မှတ်လမ်းကြောင်းအတိုင်း ဒီဇင်ဘာ ရေတံခွန်နှင့် အပန်းဖြေစခန်း (ဒီဇင်ဘာခြံ)သို့ ဆက်လက်စီးနင်းခဲ့ကြသည်။
ယင်းနောက် စက်ဘီးစီးနင်းပြီး ပြန်လည်ဝင်ရောက် လာသူများအား မန္တလေးတိုင်းဝန်ကြီးချုပ်၊ ဟိုတယ်ခရီး ဒု-ဝန်ကြီးနှင့်တာဝန်ရှိသူများက အမှတ်တရ လည်ဆွဲဆုတံဆိပ်များနှင့် ဂုဏ်ပြုလက်မှတ်များပေးအပ်ခဲ့ကြောင်း သိရသည်။
မန္တလေးတိုင်းအတွင်း ကျေးလက်ဒေသများ၏ စိတ်ဝင်စားဖွယ် ရိုးရာယဉ်ကျေးမှု ဓလေ့စရိုက်များ၊ ပတ်ဝန်းကျင် ရေမြေတောတောင်သဘာဝ ရှုခင်းများတွင် အပန်းဖြေလေ့လာခြင်းများကို ခရီးသွားများ ပိုမိုစိတ်ဝင်စားကာလာရောက်လည်ပတ်စေရန် ရည်ရွယ်၍ ခရီးသွားလုပ်ငန်း မြှင့်တင်ရေးလှုပ်ရှားမှု တစ်ရပ်အဖြစ် ကျေးလက်ဒေသ စက်ဘီးစီးခရီးစဥ်ကို ကျင်းပခြင်းဖြစ်ကြောင်း သိရသည်။
ကျော်စိုးသူ
Ещё видео!