Անընդհատ ագրեսիա իրականացնելն ու նոր տարածքներ զավթելու մղումը, ինչպես նաև զուգահեռաբար Հայաստանի և Արցախի բնակչության վրա ճնշում գործադրելն Ադրբեջանի գործողությունների տրամաբանության մեջ է, որի նպատակն ամբողջությամբ Արցախը հայաթափելն է և դեռ չօկուպացված հատվածների բռնազավթումը, - նշում է ադրբեջանագետ Տարոն Հովհաննիսյանը` անդրադառնալով նախօրեին Արցախում տեղի ունեցած դեպքերին։
Ավելի վաղ հայտնի էր դարձել, որ օգոստոսի 9-ին, հակառակորդը խախտել է հրադադարի պահպանման ռեժիմը հարավարևմտյան՝ Շոշ-Մխիթարաշեն հատվածում: Բացի հրաձգային զինատեսակներից ադրբեջանական զինուժը կիրառել է նաև նռնականետ՝ հայկական դիրքերի ուղղությամբ արձակելով 3 արկ: Հայկական կողմը կորուստներ չունի։
«Ադրբեջանը վերջին ամիսներին առիթը բաց չի թողնում նոր սադրանքների կամ ագրեսիայի դիմելու համար, և թիրախը հիմնականում հայ–ադրբեջանական սահմանի Գեղարքունիքի, Սյունիքի և Երասխի հատվածներն են։ Արցախում իրավիճակը համեմատաբար հանգիստ էր, սակայն վերջին շրջանում այնտեղ նույնպես ադրբեջանցիները սկսել են էականորեն ակտիվանալ և մասնավորապես օգոստոսի 9-ին իրականացրել են բավականին լուրջ սադրանք Մխիթարաշենի և Շոշի ուղղությամբ` կիրառելով նաև հաստոցավոր հակատանկային նռնականետներ, ինչը մեծացնում է էսկալացիայի տրամաչափը»,– ասաց վերլուծաբանը։
Նյութի աղբյուր՝ 1in.am, medialab.am
#lurer #hapk #adrbejan #turkia #erdoxan #aliev #syunik #putin #xaxaxpahner #hayastan
