Фольксвагеннің басына келген дау сейілер емес. Көлік өндіруші концерн экологиялық сынақ нәтижелерін бұрмалап көрсететін құрылғыларды өз өнімінен бөлек, Ауди мен Порше көліктеріне де орнатқан.
Бұл жайында АҚШ-тың қоршаған ортаны қорғау федералды агенттігі мәлім етті. Осыған дейін көлемі 2 литрлік дизельді қозғалтқышы бар көліктерге тексеріс жүргізілген болатын.
Енді арнайы мамандар күдікті машиналар қатарына қозғалтқыш көлемі 3 литрге тең Audi A6, A7, A8, Q5, «Порше Кайен» мен Фольксваген «Туарег»-ті қосқан. Естеріңізде болса, қыркүйекте концерн экологиялық талаптарға сай келмегенімен, қоршаған ортаны ластау нәтижелерін бұрмалағандығы үшін 18 миллиард айыппұл төлеуге мәжбүр болған-ды. Көлік өндірушісі осыған байланысты АҚШ-тағы 482 мың және әлем бойынша 11 миллион көлікті қайтаратын болған. Алайда конценрн билігі АҚШ экологтарының қазіргі айыптауымен келіспейтіндерін жеткізуде.
