Маңғыстаулық азамат Айбек Қосуақов бар күш-жігерін туған жерін түлетуге жұмсап келеді. Түпқараған ауданына қарасты Таушық ауылында тұратын кәсіпкер саябақ пен көшелерді абаттандырып, әлеуметтік нысандар тұрғызды. Жастардың жұмысқа орналасып, оқушылардың мектепке қажетті құралдармен қамтылуына тұрақты түрде қолдау көрсетуде.
Ол жақында бөбектерге арналған заман талабына сай балабақшаны сыйға тартпақ. Кәсіпкер қаражатына салынып жатқан әлеуметтік нысан алдағы айда пайдалануға беріледі.
Таушықтағы жалғыз мемлекеттік балабақша мектеп жасына дейінгі бар баланы қамтуға қауқарсыз. Бақша кезегінде әлі 258 бала тұр. Бар үміт кәсіпкер Айбек Қосуақовтың қаржысына салынып жатқан жекеменшік нысанда. 100 балаға арналған ғимарат құрылысы келесі айда аяқталады.
Зүлфия Маралбекова, Таушық ауылының тұрғыны:
-Өзім мектепте және «Айгүл» балабақшасында жұмыс жасаймын, ағылшын тілі пәнінің мұғалімімін. 2 ұлым бар. Олар 2 және 4 жаста. Балаларымның балабақша кезегінде тұрғанына 3 жыл болды. Енді осы жаңадан балабақша ашылғалы жатыр. Соның ашылғанына қуанып жатқан жайымыз бар. Себебі біздің түйткіл мәселеміз шешіліп жатыр.
Кәсіпкер заман талабына сай балабақшаны тұрғызу үшін 300 млн теңге жұмсаған. Жұмыссыз жүрген ауылдың 30 тұрғыны еңбек ететін болады. Айбек Қосуақов «Ауыл ажары азаматынан» деген қағиданы ұстанады. Ол 10 жылдан бері ауылды көркейтуге атсалысып келеді. Саябақ пен көшелерді абаттандырып, мейрамхана, Ардагерлер үйін салып берген.
Күшікбай Сағатов, «Таушық» ауылдық ардагерлер кеңесінің төрағасы:
-Осы Ардагерлер үйін ашып, ардагерлдердің бос уақыты болмасын деп, далада жүрмесін деп кіргізді. Міне, осында келіп, түрлі әңгімелер өтеді. Мұның іші қыста жылы, жазда салқын. Ардагерлер бос уақытында басқа жерде болмайды. Кейбір ардагердің даталы күндері осы Ардагерлер үйінде өтеді.
Жоғары оқу орнын бітірген соң Айбек Қосуақов қаланы емес, ауылды таңдады. Туған жерге оралып, ата кәсіпті жалғады. Қазір өңірдегі ең ірі түйе шаруашылығын басқарады. Төрт түліктің төресі түйенің еті мен сүтін өндіріп, терісі мен жүнін өңдейді. Жүзден астам ауыл халқын тұрақты жұмыспен қамтып отыр.
Айбек Қосуақов, кәсіпкер:
-Отбасылар келіп, көмек сұрайды. Кеше де бір ауыл азаматы келіп, жағдайым нашар, еді, осындай құрылыс материалдарымен көмектессеңіз деген соң қазір құрылыс салып жатсақ та, жетіспеушілік болып жатса да енді, қолдан келген көмегімізді қайтармайық деп, құрылыс материалдарымен көмектесіп жатырмыз. Үйінің алдынан времянка тұрғызуына көмектестік.
Жаны жомарт кәсіпкер жыл сайын көп балалы отбасылардың балаларына қаржылай көмек беріп, мектепке қажетті құрал-жабдықтарын алып береді. Биыл да 20-ға жуық баланы жаңа оқу жылына дайындап жатыр.
Авторлары: Гүлмира Әбішева, Ренат Досалиев
![](https://i.ytimg.com/vi/79rjEbZKreY/maxresdefault.jpg)