İyulun 15-i gecə saatlarında Azərbaycan Ordusunun Şuşa şəhəri ətrafındakı mövqeləri atıcı silahlardan atəşə tutulub. Bu barədə Musavat.com-a Müdafiə Nazirliyindən məlumat verilib.
Atəş, Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələri tərəfindən açılıb. Qarşı tərəfin susdurulması məqsədilə cavab atəşi açılıb.
Azərbaycan Ordusunun şəxsi heyəti arasında həlak olan və yaralanan yoxdur.
Ermənilərin təxribatı dayanmər və bütün bunlar yeni müharibənin başlanğıcı ola bilərmi? Düşmən revanşist hisslərlə çıxış edir, arxasında qüvvə hiss edərək irəliləmək istəyir, yoxsa?
Ermənilərin sınmış “buynuzu”nu onlar “itiləyir”-Şuşaya diplomatların səfərindən sonra Ermənistan Xarici İşlər Nazirliyinin həmin dövlətlərin diplomatik missiya rəhbərlərini dəvət edərək onlara etiraz notası təqdim etməsi, həm bu qədim Azərbaycan şəhərini atəşə tutması, eləcə də Naxçıvan istiqamətində atəşkəsin pozulması planlaşdırılmış təxribatdır. Üç ölkənin, eləcə də ABŞ səfirinin Şuşa səfərindən imtinasından sonra bu ölkənin dövlət katibinin Paşinyana zəngi və telefon söhbətində yenidən “ATƏT-in Misk Qrupunun fəaliyyətinin bərpa edilməsinin vacibliyi baradə danışması”, hansısa erməni problemlərinin gündəmə gətirilməsi Ermənistanı Bakıya qarşı yenidən təxribatlara həvəsləndirir. Məlumdur ki, Rusiya Şuşa məsələsində kifayət qədər məntiqli mövqe tutsa da, Minsk Qrupunun fəaliyyətinin bərpasında maraqlıdır. Fransanın da erməni siyasəti yürütdüyünü və mənasız üçlüyün yenidən “Qarabağ probleminin həllinə” qoşulmasını az qala tələb edir. Beləliklə, erməni təxribatlarının iki əsas məqsədi ortaya çıxır. Şuşanın guya hansısa mübahisə predmeti olduğunu qabartmaq və vəziyyəti gərginləşdirirək Minsk Qrupunu yenidən ortaya salmaq. Bununla da həm ABŞ , həm Fransa Qarabağ məsələsinə birbaşa çıxış əldə edə və yenə də Azərbaycana təzyiq üçün diplomatik kanallarla ermənipərəst siyasəti davam etdirə bilərlər. Azərbaycanın Şuşada hərbi və siyasi cəhətdən möhkəmlənməsi, xüsusən Şuşa Bəyannaməsinin imzalanmasından sonra Xankəndi üzərində həm hərbi, həm strateji, həm də siyasi üstünlük əldə etməsi isə Rusiyanın maraqlarına daxil deyil. Şuşada möhkəmlənmə bütün Qarabağda mövqeləri möhkəmlətmək deməkdir və Şuşa qorxusu erməniləri hürküdən ən ciddi faktordur. Rusiyanın məsuliyyət zonasından mövqelərimizə atəş açılması ermənilərə yalnız bir-iki günlük deyil, bir neçə gülləlik təskinlik ola bilər. Son vaxtlar sülhməramlıların atəşkəsə nəzarət edə bilməməsi faktı isə Azərbaycanın xeyirinə işləyən arqumentdir. Bu, bir daha bizə sülhməramlıların statusunu, atəşkəsi qoruya bilmədiklərini, erməni silahlı qüvvələrinin Qarabağdan çıxarılmasını təmin edə bilmədiklərini gündəmə gətirmək fürsəti verir.
Prezident İlham Aliyev dünən dünyaya və yerli ictimaiyyətə mühüm mesajlar verdi. O mesajlarda Rusiyanın və Avropanın payına nə düşür? İ.Əliyev bir daha tarixi torpaqlarımıza qayıdacağımızı dedi və öz fikrini aşağıdakı cümlələrlə ifadə etdi: “Biz həqiqəti deyirik. Bizim dədə-baba torpağımızdır: bütün Zəngəzur - Şərqi və Qərbi Zəngəzur. İndi Ermənistanda deyirlər ki, İlham Əliyev ərazi iddiası ilə çıxış edir. Əgər Şərqi Zəngəzur varsa, deməli Qərbi Zəngəzur da var. Bəli, Qərbi Zəngəzur bizim dədə-baba torpağımızdır. Demişəm ki, biz oraya qayıtmalıyıq. Bunu hələ on il bundan əvvəl demişəm. Mənim çıxışlarım hamısı mətbuatda var. Demişəm ki, bizim dədə-baba torpağımızdır, biz oraya qayıtmalıyıq və qayıdacağıq və qayıdırıq. Heç kim bizi dayandıra bilməz. Mütləq qayıdacağıq, çünki bunun başqa yolu yoxdur.
İndi bütün kommunikasiyalar açılandan sonra, əlbəttə, biz qayıdacağıq və Azərbaycan əhalisi öz dədə-baba torpaqlarına qayıdacaq. Üçtərəfli 10 noyabr Bəyanatında göstərilir: Bütün qaçqınlar öz doğma torpaqlarına qayıtmalıdırlar. Bizim doğma torpağımız Zəngəzurdur, bizim doğma torpağımız Göyçə mahalıdır, İrəvandır. Biz qayıdacağıq, əlbəttə".
![](https://i.ytimg.com/vi/7Yesgc7Tqe0/maxresdefault.jpg)