Саяси тартыс пен қауіп-қатер ошағына айналған Сирия аумағында әлі де жағдай тұрақсыз. Мықтап бекінген содырлардың берілгісі жоқ.
Түркияның қарулы күштері кешелі-бері осы ел аумағындағы «Ирак және Левант» лаңкестік тобы басып алған 194 нысанның көзін жойды. Дені Шам елінің солтүстігінде орналасқан.
Бұдан бөлек, операция барысында содырлардың 6 штабы мен Эль-Баб және Бзагах аудандарындағы жарылғыш заттар дайындайтын жасырын орындар жермен-жексен етілді.
Шам елі десе жас бала ертегі әлемін еске алып, ересек күрсіне бастайды. Сәулеті мен мәдениеті талайдың таңдайын қақтырған көне елдің бүгінгі ахуалы адам шошытады.
2011 жылдан бері онда соғыс жүріп жатыр. Содан бері шам елінде балалық шақтың не екенін білмейтін бөбектер мен көз жасы көл болған ана, табаны тоз болған әкенің бейнесі ғана. Жарылыстардан көз ашпайтын, қанға бөккен Сирия нағыз соғыстың ошағына айналды.
Сириядағы соғыс ішкі оппозиция мен мемлекет тарапының ғана тартысы емес. Онда қой терісін жамылған қасқырдай дінді айла еткендер де бар.
Содырлар шеберлігін шыңдап, күллі әлемге қауіп төндіруде. Кей сарапшылар: ««Ирак және Левант» лаңкестік ұйымының Отаны да осы шығыс елінде», – дейді.
Блиц:
-Қасық қанымыз қалғанша елімізді қорғауға дайынбыз. Кейбір тараптар үшін бұл ойын әспетті. Халық шаршады. Соғысқа нүкте қойылса екен. Бұл сұмдықтың аяқталғанын қалаймыз.
Бүгін тағы да таңға жуық жарылыс болды. Кезекті әуедегі атыс 6 сәбидің жанын алды. 8 бүлдіршін ауыр жарақатанған. Бұл тек Идлиб қаласындағы оқиға. Шам еліндегі шатақтың қашан аяқталары белгісіз. Бірақ сириялықтарды біріктіретін бір үміт, бір тілек бар.
Блиц:
-Мен Қазақстандағы конференция бітімгерлікке әкеледі деп үміттенемін. Жаратқаннан тек бейбітшілікті тілеймін. Тараптар ортақ пікірге келсе екен.
-Мен келіссөздер шынайы, нәтижелі және әділетті өтеді деп үміттенемін. Барлық кикілжіңдер доғарылса екен. Қауіпсіздік қайта орнап, бұрынғы қалпымызға келсек екен.
Ресми деректер бойынша, Сирия қарулы күштерінде 120 мыңдай сарбаз бар. Ал оппозиция тарапында мемлекетке қарсы 50 мыңға жуық адам әрекет етуде. Салдарынан 17 миллион халқы бар ел күлге айналуда. Ал соғыс жылдарында 5 миллионға жуық бейбіт тұрғын соғыстың құрбаны болды.
Енді сириялықтар өз елін тастауға мәжбүр. Панасыз, аш-жалаңаш сириялықтарды өзге елдер енді қабылдамақ емес.
Біріккен Ұлттар Ұйымының мәліметінше, соңғы алты жыл ішінде Сириядан 4 миллионнан астам азамат бас сауғалаған.
Авторлары: Гауһар Омарбек
