Forcat Speciale të Forcave të Armatosura të Shqipërisë, bashkë me forcat speciale të komisariatit special “RENEA” dhe efektivë nga Grupi i 19 i Forcave Speciale amerikane, po marrin pjesë në stërvitjen Joint Combined Exchange Training, JCET, e cila po zhvillohet në vendin tonë në periudhën 01 - 31 tetor 2016.
Stërvitja JCET po zhvillohet kryesisht në mjediset stërvitore të batalionit të Forcave Speciale në Garnizonin Zall-Herr, por ajo është shtrirë edhe në disa pjesë të caktuara të qytetit të Tiranës.
Ditën e sotme “teatër” i stërvitjes ka qenë Universiteti i Arteve ku trupat pjesëmarrëse kanë demonstruar disa nga veprimet për të cilat janë duke u stërvitur këto ditë.
I pranishëm në Universitetin e Arteve ishte dhe zëvendësministri i Mbrojtjes z. Ptero Koçi i cili në fjalën e tij tha: “Kjo është një stërvitje e përvitëshme dhe më vjen mirë që ne çdo vit e më tepër kualifikohemi më tej për të garantuar sigurinë për të qenë më operabël në veprimatrinë tonë”.
Më tej ai i falenderoi për suksesin e kësaj stërvitjeje dhe tha se dhe mirëpresim bashkëpunime të tjera në mënyrë që efikasiteti i këtij bashkëpunimi të jetë maksimal sepse sfidat që kemi përpara janë vërtetë të rëndësishme.
“Ju e dini që terrorizmi është berë një potencial i rrezikshëm. Natyrisht që nuk ka sinjale që akte të tilla terroriste të ndodhin në vendin tonë por ne duhet të jemi të përgatitur për të përballuar cdo lloj situate. Situata të cilat mund të ndodhin dhe në vende të tjera ku ne mund të ndihmojmë me forcat tona të specializuara tashmmë për të përballuar rreziqet nga terroizmi”, përfundoi ai.
Infiltrimi nga toka në një godinë të zënë nga elementë keqbërës të paidentifikuar, duke mundësuar lirimin e pengjeve dhe bonifikimin e objektit, ishte skenari kryesor i këtyre demonstrimeve.
Qëllimi i stërvitjes në përgjithësi është rritja e mëtejshme e aftësive operacionale të batalionit të Forcave Speciale si partner i besuar, i denjë dhe i ndërveprueshëm për kryerjen e misioneve ndërkombëtare, aftësimi si njësi përgjegjëse për të reaguar ndaj organizatave (të mundshme) apo individëve ekstremistë dhe tejet të rrezikshëm, trajnimi i reparteve speciale për të ndërhyrë dhe vepruar në mjedis ndërkombëtar brenda dhe jashtë vendit si dhe rritja e bashkëveprimit me njësitë e tjera ligj-zbatuese, ndërmjet strukturave të Ministrisë së Punëve të Brendshme (RENEA) në kryerjen e detyrave të përbashkëta.
Në këtë stërvitje marrin pjesë edhe 3 vetë, personel i FSK me statusin “vëzhgues”.
Stërvitja JCET është stërvitje e cila zhvillohet 2 herë në vit në kuadër të bashkëpunimit dypalësh me SHBA.
![](https://i.ytimg.com/vi/9Om3d_23m3Y/mqdefault.jpg)