Մեծամորի ատոմակայանն այլեւս չի կարելի շահագործել,- կարծում է նախկին վարչապետ Հրանտ Բագրատյանը։
« Դրա ռեակտորն արդեն բարակել է, մետաղը, մի օր վտանգ կլինի Չեռնոբիլից փիս»,- ասում է նա։
Մեծամորի ատոմակայանի գործարկման առավելագույն ժամկետը, պարոն Բագրատյանի հաշվարկներով, մինչեւ 2010 թվականն էր։ «Նոր ատոմակայան է անհրաժեշտ»,-ասում է նախկին վարչապետը։ Մինչդեռ, ըստ նրա, Քոչարյանը եւ Սերժ Սարգսյանը ընդամենը դրա հիմքերն են գցել ու անցել այլ գործի։
Հրանտ Բագրատյանը զգուշացնում է՝ մի օր ՄԱԳԱՏԵ-ն կարող է մեր առջեւ խնդիր դնել դադարեցնել ատոմակայանի շահագործումը։ 14 տարի այս իշխանությունները, ըստ նախկին վարչապետի, ոչինչ չեն արել, նոր ատոմակայանի շինարարությունը նրա համոզմամբ ցանկացած քաղաքական ուժի առաջին խնդիրն է
Կոնգրեսի ներկայացուցիչն առաջարկում է արագացնել նոր ատոմակայանի շինարարությունը. «Այլապես նորից այս իշխանությունները կհասցնեն նրան, որ ատոմակայանի փակումով մութ ու ցուրտն անպայման կսկսվի»։
Հրանտ Բագրատյանը ենթադրում է, որ 1000 մեգավատանոց ռեակտորի համար կպահանջվի 5 միլիարդ դոլար։ Այդ գումարը նախկին վարչապետի պատկերացմամբ կարող է հատկացնել մեր պետբյուջեն, կարող է պետությունը մասնավոր սեկտորի հետ գործընկերությամբ իրականացնել, կարող են միջազգային կազմակերպությունները տալ այդ գումարը
«Ռուսաստանը հայտարարում է, որ կարող է մասնակցել ֆինանսավորմանը, բնականաբար կպահանջվի, որպեսզի սեփականատեր կանգնի»,- ընդգծում է նա։
Հիշեցնենք, որ Հայաստանի կառավարությունը ապրիլի կեսերին հրապարակային դիմել է Ատոմային էներգիայի միջազգային գործակալության գլխավոր տնօրենին` խնդրանքով, որ ցուցաբերեն օժանդակություն, որպեսզի գործող ատոմակայանի գործունեության ժամկետը երկարաձվի։
![](https://i.ytimg.com/vi/9XU578SxjxU/mqdefault.jpg)