Мижоздан хизмат ҳақи олиш тақиқланиши ортидан, айрим хусусий бандлик агентликлари ишини тўхтатишга мажбур бўлмоқда.

Ташқи меҳнат миграцияси агентлиги бошлиғи Муҳаммадзокир Маматхонов маҳаллий матбуотга, "қатор агентликлар" лицензиясини бекор қилишни сўраб, ариза киритганини билдирди.

Янги қонуний тартибга кўра, хусусий бандлик агентликларига хорижга йўллаган мижозларидан хизмат ҳақи олиш тақиқланган, маслаҳат ва ахборот хизмати учун олинадиган ҳақ миқдори ҳам чекланган.

Ўзбекистонда шу йилнинг 14 ноябридан бошлаб "Хусусий бандлик агентликлари тўғрисида"ги қонунга киритилган ўзгартириш ва қўшимчалар кучга кирганди.

Янги тартибга кўра, Ўзбекистон ватандошларига хориждан иш топиб берадиган хусусий агентликлар ўз мижозидан хизмат ҳақи олиши мумкин эмас. Қонунга биноан агентликлар бу ҳақни ишчига иш бераётган хорижий ширкатдан ундириши лозим.

Хусусий агентликлар фақатгина маслаҳат ва ахборот хизмати учун ҳақ олиши мумкин, аммо бу сумма ҳам базавий ҳисоблаш миқдорининг бир баравари (тақрибан 223 минг сўм) миқдорида чекланган.

Бундан ташқари, миграция бозорида иш бошламоқчи бўлган хусусий агентликлар лицензия олиш учун, Меҳнат вазирлиги ҳузуридаги жамғармага базавий ҳисоблаш миқдорининг 8500 баравари (тақрибан 1 миллиард 90 миллион сўм) миқдорида захира маблағ қўйиши лозим.

Бунинг устига, агентликда тузилган ҳар бир шартнома нусхаси Меҳнат вазирлиги маълумотлар базасига киритилиши шарт.

Бу янги тартиб кучга кириши билан, мамлакатда ишлаш ҳуқуқини сақлаб турган саноқли хусусий бандлик агентликлари ҳам фаолиятини тўхтатишга қарор қилган.

Daryo.uz нашрининг ёзишича, бу ҳақда Ташқи меҳнат миграцияси агентлиги бошлиғи Муҳаммадзокир Маматхонов маълум қилган. Аммо, масъул конкрет қанча ширкат ишидан воз кечишга қарор қилганини билдирмаган.

свернуть