Былтырдан бері әзірленіп жатқан әлеуметтік кодекс мемлекеттік жәрдемақының мөлшерін де, оны тағайындау тетігін де түбегейлі өзгертіп жіберуі мүмкін. Президент кодекс «қоғамдық шарттың» негізгі бөлігіне айналуы қажет деп еді. Мемлекет басшысы барлық қазақстандық болашағын ойлап, өздеріне жауапкершілік пен міндеттемелер ала бастауы керек екенін де еске салды. Кейбір сарапшылар, кодекс қабылданбай тұрып, халықтың әл-ауқатын жақсартуға негізделген жұмысты Үкімет толық атқарып алуы керек дейді. Әйтпесе, кодекстің аясында жүзеге асатын бағдарламалар сәтсіз болатынын алға тартады. Әріптесім Әйгерім Ердәулет толықтырады.
Жаңа әлеуметтік кодекстің басты міндеті - мемлекеттен кім, қандай жағдайда және қандай көмек ала алатынын нақты бекіту. Ашық үкімет порталында талқыға түскен кодекстің тұжырымдамасына қатысты пікір білдірген бұқара тым аз екен. Құжатты әзірлеу үшін әлеуметтік саланы реттейтін барлық заңды біріктіру қажет деп көрсетілген. Яғни, жәрдемақы, атаулы көмек, міндетті әлеуметтік сақтандыру, зейнетақы туралы сияқты 17 заң әлі де пісіп-жетілуі керек. Көпшілік, әлеуметтік кодекске қазіргі әл-ауқатымызды жақсартуға бағытталса ғана қарсылығымыз жоқ деп отыр.
Өз күндерін өздері көруге мүмкіндік бар ғой қазір, жұмыс та бар, жұмыс жасаймын деген адамдарға. Мен ойлаймын енді керек шығар. Адамдар өзіне-өзі жауапкершілігін арттыратын шығар, әлі де болса Үкіметке ауыртпашылық салмай.
Иә, Кодексте әлеуметтік саладағы барлық заңнама қайта сүзгіден өткізіледі. Экономистер, бәлкім атаулы әлеуметтік көмекті тағайындау секілді асығыс қабылданған шешімдер қайта өзгеруі мүмкін екенін жоққа шығармайды. Десе де, сарапшылар, кодекс қабылданбай тұрып, Үкімет жұмыссыздардың саны мен кедейшілік шегіне қатысты шынайы статитикаға тік қарауы керек дейді. Өйткені, статистика бюросының емес дүниежүзілік банктің зерттеуінше Қазақстанда еңбекке жарамды азаматтардың ішіндегі 12 пайызының күнделікті табысы 2,5 мың теңгеден де аспайды.
МАҚСАТ ХАЛЫҚ, экономист:
– Бірден кесіп айту керек, біздің халықты масыл деп айтуға келмейді. Ешқалай келмейді. Еуропада иә масылдық деген проблема бар. Өйткені ол жақта жұмыссыз жүрген адамның өзі 600 еуроның үстінде ең аз дегенде жәрдемақы алады. Міне осы масылдық, осыны масылдық проблема деуге болады. Ал біздегі төленіп жатқан төлемдер өте төмен. Бізде қазір ең төменгі күнкөріс шегі бекітілген, ол қазір 34 мың теңге. Бүкіл әлеуметтік төлемдердің бәрі осы шектен төмен табатын азаматтарға қарай бағытталады.
Қарапайым халық та, сарапшылар да әлеуметтік жәрдемақы бірден екі есеге өспесе, кодекстен келіп-кетер пайда жоқ деп отыр. Немесе көз ілеспес жылдамдықпен өсіп жатқан қымбатшылықты ауыздықтау қажет екенін айтады. Айта кету керек, 2019 жылы атаулы әлеуметтік көмекті алушылар саны бірден 3,4 есеге артып, 1 924 мың адамға мемлекеттен көмек көрсетілген. Артынша, табыстарын жасырған 73 мыңнан астам отбасының мемлекеттен 630 миллион теңге заңсыз жәрдемақы алғаны белгілі болған. Қазір бұл көмекті 973 мыңнан астам жанұя алып отыр екен.
.
.
.
.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#информбюро #басты_жаңалықтар #Ақиқатын_Айтайық
![](https://i.ytimg.com/vi/A3FVj5MpCcE/maxresdefault.jpg)