Kreu i grupit parlamentar të Lëvizjes Socialiste për Integrim, Petrit Vasili, ka sqaruar deklaratën e nënkryetarit të LSI-së, Luan Rama.
Në fjalën e tij në Kuvend, Rama tha se foltorja është e ‘pushtuar’ prej disa javësh. Kryetari i Kuvendit, Gramoz Ruçi i tha se “pushtuesi” është Lulzim Basha.
Vasili nga jashtë Kuvendit ka thënë se Luan Rama ka qenë dakord për të folur Basha. I pyetur për qëndrimin e LSI-së, pasi dy deputetë të kësaj partie kanë marrë pjesë në votim, ka thënë se:
”Qëndrimi për parlamentin është një parlament uzurpator që ka hequr të drejtën e fjalës, pa të drejtën e fjalës të gjitha janë pa vlerë politike e prova të një parlamenti të rrënuar”.
Fjala e plotë e Vasilit:
Nënkryetari i LSI-së, Luan Rama kërkoi që Basha të vazhdonte të fliste,dhe të merrte të gjithë kohën e duhur. Sot rrëmbimi i fjalës, shkatërrimi i parlamentit si institucion, për të justifikuar opinionin negativ për negociatat, pikërisht për shkak të kësaj qeverisje, bënë hapin e fundit të shkatërrimit. Koperativa e Ruçit, Ballës, Ramës vendosën të koperativojnë dhe parlamentin. Sipas tij me mbylljen e fjalës së Bashës nga Gramoz Ruçi, parlamentarizimi ka vdekur. Sot rrënuan institucionin e parlamentit. I hoqën të drejtën që të fliste kreut të opozitës. Në momentin që fjala mohohet atëherë parlamenti nuk funksionon më. Zoti Luan Rama kërkoi që Lulzim Basha të fliste.
