Жорий йилнинг 24 августида Тошкентнинг Mont Blanc хусусий пластик хирургия клиникасида жарроҳлик амалиётидан ўтаётган 20 яшар самарқандлик Гулшан Шарифова вафот этди. Гулшан Mont Blanc врачлари хатоси билан 10 кун ичида нобуд бўлган иккинчи мижоздир.
Ушбу клиника фаолиятидан хабардор мутахассислар Mont Blanc клиникасидаги ўлимлар юзасидан ҳеч ким жавобгарликка тортилмаган, иш ёпти-ёпти қилиб юборилган демоқда. Клиника ўлимлар ортидан ўз номини ўзгартирган.
Гулшан Шарифовани операция қилган врач Фахриддин Облоқулов айбни анестезиологга тўнкади ва "юзлаб қилинаётган тиббий жарроҳлик амалиётлари давомида организми кучсиз бўлган 1-2 бундай мижозлар ўлими одатий ҳолатдир" деди.
2019 йилнинг 24 августида Тошкентнинг Бунёдкор проспектида жойлашган Mont Blanc хусусий пластик шифохонасига самарқандлик 20 яшар Гулшан Шарифова мурожаат қилади: Гулшаннинг бурнида чиққан майда ўсимта унинг нафас олишига халақит бериб келган.
Гулшан Шарифованинг отаси Умид Абдушукуровнинг Озодликка сўзлашича, кўринишидан оддий бўлган ва бошқа клиникаларда 500 минг сўм турадиган бу жарроҳлик амалиётига у 8 миллион сўм пул берган:
- Дўхтир 14 августда кўриб, “Бўлди, 20 минутлик операция. Шундоқ операция қиламиз – уйингизга олиб кетаверасиз!”, деди. 24 август куни операцияга олиб киришдан олдин дўхтирига ҳам, анестезиологига ҳам айтдим – “Фақат текшириб олинглар – аллергияси бор!”, десам “Биз ишимизни биламиз, хавотир олманг, пулини тўланг”, дейишди. 20 минут ўтмасдан “Қизингиз комага тушиб қолди!”, деб айтишди.
Гулшан Шарифовани комадан чиқаришга 2 соат уринган врачлар, уни “AKFA МедЛайн” шифохонасига жўнатади. Аммо у ерда ҳам врачлар аёлни ўзига келтира олмади.
Умиднинг айтишича, қизи ўлимидан бир неча кун олдин бу клиникада худди шу врачлар қўлида яна бир аёл нобуд бўлган:
- 3 кун комада ётган қизим ўша ерда тамом бўлди. Биз текшириб кўрсак, 19 август куни худди шунақа операция пайтида 42 яшар аёлни ўлдиришган экан. Прокуратура келди, жиноят иши очамиз, деди, фақат “Иш очилса ўлик шу ерда қолади, уни ёриб текширамиз!”, дейишгандан кейин Самарқандга олиб бориб кўмдик, - деди Умид.
