Жамбыл облысында қазақ-қырғыз шекарасында болған оқыс оқиғадан кейін мемлекеттік шекара күшейтілді.
Қазір шекара бұзып, із суытып үлгерген топ мүшелері іздестіріліп жатыр. Оқиға 12 тамызда Жасөркен ауылы маңында болған. 15 адамнан құралған белгісіз топ Қазақстан шекарасын кесіп өтпек болған. Оларды арнайы спиральді кедергі арқылы жол ашып жатқан кезде шекарашылар байқап қалған. Заңсыз әрекетті тоқтату үшін әскерилер ескерту жасап, аспанға оқ атады. Алайда шекара бұзушылар оған құлақ аспай, тіпті қарсы күш қолданған. Шекара күзетшілері түрлі дәрежеде жарақат алды. Және қару қолдануға мәжбүр болып, біреуін жаралаған. Кейін оның алған жарақаттан қайтыс болғаны белгілі болды. Ал қалғандары бой тасалап үлгерген.
Оксана Парпура, ҚР ҰҚК Шекара қызметінің баспасөз хатшысы:
- Жамбыл облысында шекарада болған жағдайға байланысты кезекшілік күшейтілді. Шекара қызметі қосымша күш-құралдарын жеткізді. Барлық құқық қорғау органдары ақпараттандырылды. Қазір тергеу шаралары жүргізіліп жатыр.
![](https://i.ytimg.com/vi/BmZSo1ypEM0/maxresdefault.jpg)