,,თბილისმა დიდი ხანია სააკაშვილს ზურგი აქცია, თბილისის მცხოვრებლები შეწუხებულები არიან იმით, რასაც თავად ავტორიტარულ მმართველობას უწოდებენ და ხაზს უსვამენ იმ ფაქტს, რომ პარლამენტს, სასამართლოსა და პროკურატურას სააკაშვილი აკონტროლებს" - წერს ,,ვაშინგტონ პოსტი". საქართველოს წინასაარჩევნო პერიოდი კვლავ დასავლური მედიის ყურადღენის ცენტრშია. ,,ვაშინგტონ პოსტის" თანახმად კოალიცია ,,ქართული ოცნების" გუშინდელ აქციაზე საქართველოს დედაქალაქში ოპოზიციის 100 ათასამდე მხარდამჭერი შეიკრიბა, რათა ეჩვენებინა ძალა იმ საპარლამენტო არჩევნების წინ, რომელიც პრეზიდენტ მიხეილ სააკაშვილის მთავრობის მომავლისთვის ყველაზე დიდი გამოწვევაა, მას შემდეგ რაც იგი 2004 წელს ხელისუფლების სათავეში მოვიდა. გუშინდელ აქციას ეხმაურება გერმანული ,,დოიჩე ველეც," რომლის ინტერნეტ გამოცემაც წერს, რომ ბიძინა ივანიშვილისთვის მხარდაჭერის გამოსახატად თბილისში თავისუფლების მოედანი ხალხის უზარმაზარმა ნაკადმა გაავსო. გამოცემა ასევე ყურადღებას ამახვილებს იმ ფაქტზე, რომ ორშაბათის არჩევნების შემდეგ საკონსტიტუციო ცვლილებების თანახმად, საქართველოს პარლამენტისა და პრემიერ-მინისტრის უფლებამოსილება გაიზრდება პრეზიდენტის ძალაუფლების შემცირების ხარჯზე .

свернуть