Ақмола облысы Степногорск қаласында алтын өндірумен айналысатын Нариман Ементаев өзінің 120 тонна алтын концентратына қолы жетпей жүр. Айтуынша, полиция: "Қазақалтын" компаниясының шахтасынан алтын ұрланды, сендердің тауарларыңды да тексереміз" деп, зерттеуге алып кеткен. Бірақ, қарашадан бері қап-қап концентратты әлі ешкім сараптамадан өткізбепті. Іс созылып кеткендіктен, кәсіпкер: "103 миллион теңгенің тауарын қылмыстық іске қатысты деп танып, тәркілеп алып қоя ма" деп күдіктеніп отыр.
Былтырғы 19 қарашада "ұрланған алтынды табамыз" деп келген полицейлер әй-шайға қарамай: "қасарыспаңдар, қақпаны бұзып кірсек те алтындарыңды алып кетеміз" дейді шағым айтушы тарап. Өз тауарларының ұрлықы еместігіне сенімді мұндағылар амалсыз көніпті. 1 сағатта жаз бойы жинаған, Ресейге жөнелтуге буып-түйіп қойған 120 тонна алтын концентратын со кезде полиция тиеп алып кетіпті.
НҰРЛАН ЕМЕНТАЕВ, Алтын өндіруші компанияның заңгері:
– Сол уақыттан бері до сих пор бізге әлі бір рет те түсіндірген жоқ. На каком основание? Неге олар алып кетті? "Біз Қазақалтынның материальный базасына апарып қоямыз, сонда сіздер келесіздер, біз тексереміз, зерттейміз" деп айтады дейді.
Бірақ, әлі сараптама жасалмапты. Бар жауаптары: "күтіңіздер". Қазір мұндағы жұмысшылар айлықсыз отыр. "Несие мен қарызымыз шаш етектен болды" дейді.
АСАН ЖАҢБЫРБАЙҰЛЫ, электрик:
– Основной азық-түлікке барады ғой. Киімдеріміз бар, балаларымыз бар, немерелеріміз бар, сол күн көріп жүрміз. Көп кредиттар бар, қарыздарымыз бар. Сол содан шыға алмай жүрміз.
Кәсіпорын директоры "біздегі алтын концентраты өзгенікі емес, барлық құжатымыз міне, ешқандай заң бұзбадық деп" ішкі істер министріне, бас прокуорға да арызданған. Бірақ, әзірге нәтиже жоқ. Алтын өндіруші "Қазақалтынның" шахтасынан жиі алтын ұрланатыны соңғы кезде ашық айтылып жүр. Мысалы, 2019-2020 жылдары ұрлықпен 6216 адам ұсталған. Ал, мұндағылар: "біздің алтын жер бетінен құм күйінде, "Қазақалттының" алтыны жер астынан тас күйінде өндіріледі" десе де, полицейлер мұны ескермепті. Тіпті, офистері мен директордың үйін тінтіген. Ал, жауаптылар болса "алтын ұрлығына қатысты тергеу амалдары жүріп жатыр, ол туралы ақпаратты жария ете алмаймыз" деді.
МАРАТ БЕКШЕТАЕВ, ҚР ІІМ Тергеу департаментінің аса маңызды істер жөніндегі аға тергеушісі:
– Қазақстан Республикасының ҚК 188-бабының 4-ші бөлігімен, 262-бабының 2-ші бөлігімен сотқа дейінгі тергеп, тексеруді жүргізуде. Нәтижесі мен шешімі бойынша процессуалдық шешім қабылданады. Тергеу барысы жөнінде Қазақстан Республикасының Қылмыстық Процестік кодексінің 201-бабының талаптарына сай сотқа дейінгі тергеп, тексеру деректері жарияланбайды.
АЙБАР ТӨЛЖАНҰЛЫ, тілші:
– Құзырлы органдағылардың жауапсыздығынан әбден шаршадық деген Нариман Ементаев: "бұл істің артында бизнесімізге қызыққан ірі инвестор тұр" деп топшылайды. Өйткені ешқандай қылмыстық іске қатысы болмаса да тергеуге алған тәртіп сақшылары: "қанша пайда табасың, алтынның қанша қоры бар" деген сияқты жария етуге болмайтын ақпараттарды сұрайды екен. Ал, бас прокуратурадан бастап Президент әкімшілігіне дейін шағымданған кәсіпкер: "қайтсем де өз тауарымды дәлелдеп шығамын" деп бекініп отыр.
Айбар Төлжанұлы, Дидар Елеуов
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#ҚазақАлтын #ұрлық
