საქართველოს ტერიტორიაზე უძველესი ქართული ქრისტიანული კულტურის ადგილსამყოფელი მდინარე ფოლადაურასთან ახლოს მდებარე ბოლნისის სიონია. ბოლნისის სიონი სამნავიანი ბაზილიკაა, რომელიც საქართველოს პოლიტიკური და კულტურული აღმავლობის ხანაში აშენდა, მას შემდეგ, რაც ვახტანგ გორგასლის მოღვაწეობისა და ბრძოლის შედეგად ქართულმა ეკლესიამ მსოფლიო პატრიარქთაგან დამოკიდებულებას თავი დააღწია. თვით ბოლნისის საეპისკოპოსოც, რამდენიმე სხვა საეპისკოპოსოსთან ერთად, ვახტანგმა დააარსა. ბოლნისის სიონის წარწერებიდან ირკვევა, რომ ტაძარი აგებულია 478–493 წლებში. ბოლნისის სიონის კედლებს შემორჩა პირველი ქართული, ასოთავრულით შესრულებული წარწერები, რომელთაგან 3 ტაძრის მშენებლობას უკავშირდება. მშენებლობის მოთავე და ინიციატორი იყო დავით ეპისკოპოსი, რომელიც 506 წლის დვინის საეკლესიო კრებაში მონაწილეობდა. იმ 23 ქართველ ეპისკოპოსთა შორის, რომლებმაც ხელი მოაწერეს კრების დადგენილებას, დავით ეპისკოპოსი მე5 ადგილზეა. ეს სია იერარქიულ რიგს იცავს და ბოლნელი ეპისკოპოსისა და მისი ეპარქიის მოწინავეობაზე მეტყველებს.
სიონს 2006 წლის 7 ნოემბერს, საქართველოს პრეზიდენტის ბრძანებულების თანახმად მიენიჭა ეროვნული მნიშვნელობის კულტურის უძრავი ძეგლის კატეგორია. დღეს აქ არქეოლოგიური სამუშაოები მიმდინარეობს რომლის დროსაც არაერთი ძვირფასი ნივთია აღმოჩენილი.1989 წლიდან ბოლნისის სიონი მოქმედი ეკლესია და ბოლნელ ეპისკოპოსთა საკათედრო ტაძარია. ის საერთაშორისო მნიშვნელობის ისტორიული ტაძარია, რომელიც იუნესკოს წიგნიშია შესული. ბოლნისის სიონი თავისი არქიტექტურით, ორნამენტებით, რელიეფური ქანდაკებებით ერთ–ერთი გამორჩეული ნაგებობაა საქართველოში.
Ещё видео!