Алматыда жолаушылар автобусы мен жол талғамайтын көлік соқтығысып, 23 адам зардап шекті.
Денсаулық сақтау басқармасының хабарлауынша, жеті ересек адам ауыр жараланған. Оның екеуі қазір жансақтау бөлімінде жатыр. Сондай-ақ дәрігерлер жол апатына түскен тағы бір кішкентай баланың жағдайы ауыр екенін айтты. Қалған азаматтар тұрғылықты жері бойынша емханаларда амбулаторлық көмек алатын болады.
Айта кету керек, апат бүгін түске таяу болды. Куәгерлердің айтуынша, автобус та, жол талғамайтын көлік те Райымбек даңғылымен шығыс бағытта келе жатқан. Потемкин көшесіне жеткенде жол талғамайтын машина кенеттен оңға бұрылып, қоғамдық көліктің алдын кесіп өтпек болады. Тежегішті басып үлгермеген автобус жүргізушісі әуелі джипке, содан соң жол бойындағы бағанға соғылған.
Салтанат Әзірбек, Алматы қалалық ІІД ресми өкілі:
-Қазіргі таңда Қылмыстық кодекстің 345-бабы бойынша қылмыстық іс қозғалды. Істі Алматы қалалық ІІД Анықтау басқармасы өз құзырына алды. Тиісті сот-медициналық сараптамалар тағайындалатын болады.
![](https://s2.save4k.ru/pic/E7ik8VU5Z88/mqdefault.jpg)