RESID.YILMAZ (Gernas Koçer) ji federasyona eşîra koçerên Dudêran Şemsikî ye.
Bihara sala 1968an, êla koçeran dema ber bi zozanê Şax û Miksê ve diçe, Gernas Koçer li herêma Berwarî-Xezxêrê li gundê Hêşetê hatiye dinyayê.

Malbata wî sala 1973an dev ji koçeriyê berdide û li bajarê Êlihê bi cî dibin. Digel dibistana bi zimanê tirkî li ser daxwaziya bavê xwe li medreseyên Kurdistanê bi kurdî û erebî jî dest bi xwendin û perwerdeyê dike. Heta asta bilind bi piranî di beşa ol, felsefe, dîrok û wêjeyê de li cem alimên Bohta yên payebilind perwerdeyê dibîne.



Di 18 saliya wî de hestên wêjevanîyê lê diyar dibin û dest bi nivîsê dike. Bi despêka tevgera neteweyî re weke her welatperwer û dildarên azadiyê, ew jî li gorî hêza xwe di nava tevgera pêlên tekoşînê de cihê xwe digire. Sala 1992an tê binçavkirin işkenceyeke pir giran lê tê kirin.
Demekê li zîndana Amedê dimîne. Di wan salên dijwar de Gernas Koçer û malbata xwe jî weke gelek malbatên kurdperwer di riya têkoşînê de berdêlên gelek giran didin. Lê bi dayîna van berdêlan ti carî poşman nebûye û herdem serbilind û serfiraz e. Piştî ku ji zîndanê derdikeve, di demek kurt de dîsa fermana girtina wî derdikeve. Li aliyekî dewleta tirk lê digere, li aliyekî jî dibe hedefa Hizbûlkontra.
Piştî gelek dem û dewranan sala 2007an derbasî Swîsre dibe û bi malbata xwe ve li wir bi cih dibe.Gernas Koçer digel zimanê kurdî û tirkî , bi zimanê 'erebî ,rusî, ingilsî û elmanî diaxive.
Heta niha ji bilî gotar û nivîsan çar berhemên wî yên wêjeyî yên bi navê "Destana Şerê Kund û Qijakan", “Destana Kawayê Hesinkar" dîwana zarok û ciwanan bi navê “Kulîlk",û "Serhatîyek Li gundê Midihê" hatine çapkirin. Herwiha çend berhem û destanên wî yên din jî li ber çapê ne.

свернуть