Bible-based Ecclesiastical Separatism timi tlangtar in a chimmi a si. Fiannak in A Dang Tein A Ummi Zumtu tiah ka vun taar.
Nihin vawleicung Khrihfa mi hi phungki rawl he kan i lo. Kan i cawh hnawk dih. A buaithlak taktak. Zei paoh kan ei dih. A thak he, a khaa he, a thlum he, a phaak he, a tor he kan ei dih.
Zei paoh hi kan caah a sinpi dih. Piangthar thawngtha chim zong ah Amen. Piangthar lo thawngtha chim zongah Amen. Piangsual thawngtha zong Amen. Siikaan a ngei ngaimi Liberal pawl zong Amen. Secular Scholar le Politics Idea nih pupilt a tin zong ah Amen. Palak maw kan lawh deuh, haikung dek kan lawh deuh. Piangthar lo cu zeiti awk dah a tha, piangthar hmanh hi tlaihtleng zong kan ngei lo. Hihi mah nih i theih lomi mitcawt timi cu a si.
Tluk zong ah Amen. A hmaan lo ti zongah Amen. Pentecostal movement zong Amen. Eccumenical zong Amen. Pluralism zong Amen. Science View zong Amen. Social Gospel zong Amen. Charismtic Movement zong Amen. Liberal zong kan Amen khawh hna. Zei paoh kan Amen khawh dih. Kan caah hin zei thil paoh an i khat dih.
Zei bantuk Doctrine zong a sinpi dih. Kan mit a caw dih. Cawnpiaknak hmaan lo ko hi tuchan ahcun kan duh. A hmaan lo an ti zongah kan duh chinchin. Cu tluk cun kan chan hi a chia. Piangthar hmanh hi cawnpiaknak hmaan lo a zulmi kan tam deuh.
Biatak kan theih mi zong kan aupi ngam lo. Mi huat kan ttih. Hawi ngeih lai lo kan ttih. Hmunhma ngeih lai lo hi kan ttih taktak. Minthan lo ding le kan paw a kuai ding zong kan ttih.
Fundamental le Conservative cu mino 10% hmanh kan um lai lo. Mino cu chim lo, upa hmanh dahkaw kan um lo cu. 70% - 80% hrawng cu zapi zaraan thil kan zul. A hmaan zongah vung tiah kan zuang. A hmaan lo zongah vung tiah kan zuang tthiamtthiam.
Asinain biatak hi mi tampi nih ttanh a si bal lo. A dang tein a um ngammi, a dang tein a nung ngam mi zumtu lawng nih biatak cu an dirpi ngam tawn. Cu bantuk zumtu cu nihin cathiam, mifim, mirum le minthang tampi ningzahnak caah Bawipa nih a thim hna i, amah Bawipa sunparnak le a Bia kilvennak caah a hman zungzal mi hna zumtu cu an si.
Kan pianthar hlan cu zeitik awk dah a ttha. Kan pianthar hnu tal ahcun hi tluk vawlei ah caan a tawi mi hi biatak ah kan dir ngam ve lai lo maw? Biblical Believer si ding hi piangthar paohpaoh i kan hmuitin ngan bik a si. Pathian kan lei ah a ttan ahcun a za cang.
Credit: : (Bible-based Ecclesiastical Separatism)
(International Conservative Evangelical Fellowship) ICEF Convention Conference Indianapolis, IN, USA. July 5-7, 2019
![](https://i.ytimg.com/vi/EKPd62URT_o/mqdefault.jpg)