«Ադրբեջանահայերի սոցիալական խնդիրները լուծելու, մասնավորապես, շուրջ հազար ադրբեջանահայ փախստական ընտանիքների բնակարաններով ապահովելու համար անհրաժեշտ է 50 միլիոն դոլար»,- այսօր` փախստականների միջազգային օրվա կապակցությամբ, անդրադառնալով ադրբեջանահայ փախստականների խնդիրներին, լրագրողներին ասաց. Ադրբեջանահայերի ասամբլեայի նախագահ, ադրբեջանագետ Գրիգորի Այվազյանը:
Նա հայտնեց, որ Հայաստանում մեծ թվով ադրբեջանահայ փախստականներ կան` բնակչության մոտ 10 տոկոս: Եվ այս ցուցանիշով Հայաստանն աշխարհում բարձր տեղ է զբաղեցնում:
Գ. Այվազյանը վտանգավոր համարեց այն երևույթը, որ հասարակության շրջանում ադրբեջանահայ փախստականների հանդեպ գոյություն ունի կսենոֆոբիայի դրսևորումներ:
Այնուհետև, անդրադառնալով Ղարաբաղյան պատերազմի վերսկսման հնարավորությանը, բանախոսը նշեց. «Պետք է նաև արձանագրենք, որ շատ շուտով հնարավոր է, որ տարածաշրջանն արձանագրի փախստականների նոր ալիք, քանի որ նախքան ամերիկա-իրանա-իսրայելյան պատերազմի սկիզբը հավանական է, որ Ղարաբաղյան հակամարտության գոտում պատերազմը կվերսկսվի: Ադրբեջանական գերագույն շտաբը վաղուց ծրագրել է 2012 թվականի ամառ-աշուն օպերացիան և սպասում է միայն ՌԴ-ի դիրքորոշման հստակեցմանը»:
«Մենք չպետք է հույսերս դնենք Ադրբեջանի` պատերազմին անպատրաստ լինելու վրա, այլ` պատերազմին մեր պատրաստ լինելու»,- հավելեց նա:
Անդրադառնալով ադրբեջանահայերի` հայաստանյան հասարակությանն ինտեգրվելու խնդրին, Գ. Այվազյանը նշեց. «Անտուն մարդը` «բոմժը», չի կարող ինտեգրվել հասարակությանը», այնուհետև, անցավ հաջորդ` ադրբեջանահայերի` Արցախում բնակություն հաստատելու վերաբերյալ հարցին, ասելով. «ԼՂՀ-ն այն վիճակում չէ, որ կարողանա ընդունել ադրբեջանահայ համայնքին: Ավելի քան կես միլիոն ադրբեջանահայերը չեն կարող գնալ և վերաբնակվել մի տարածքում, որի հիմնական բնակչությունը 180 հազարից չի անցնում»:
