Աստվա՛ծ, դու ինձ ուժ պարգևեցիր և իմ ճանապարհն անբիծ դարձրիր: Ինձ ոտքեր տվիր եղջերուի ոտքերի նման, և բարձր տեղերի վրա կանգնեցրիր ինձ: Ձեռքերս վարժեցրիր պատերազմի, իսկ բազուկն իմ դարձրիր ինչպես հաստ աղեղ, տվեցիր ինձ նաև քո փրկարար պաշտպանությունը: Աջդ զորավիգ եղավ ինձ, իսկ խրատդ միշտ կանգուն պահեց. քո խրատն իմաստուն կդարձնի ինձ:
Սիրում եմ քեզ, Տե՛ր, զորությո՛ւն իմ.
ո՛վ Տեր, պահպանի՛չ իմ, ապավե՛ն իմ և փրկի՛չ:
Աստված օգնականս է, ես հույսս դրել եմ նրա վրա.
իմ ապավենն է, փրկությանս եղջյուրը, ինձ ընդունողը:
Օրհնելով կկանչեմ Տիրոջը,
և իմ թշնամիներից կազատվեմ:
Մահվան տառապանքը շրջապատեց ինձ,
և անօրենության հեղեղն ինձ վրդովեց:
Դժոխքի ցավերը պաշարեցին ինձ,
և մահացու վտանգներն ինձ հասան:
Նեղությանս մեջ ես Տիրոջը դիմեցի
և իմ Աստծուն աղաղակեցի.
Նա լսեց ինձ և իմ աղոթքի ձայնն իր սուրբ տաճարից,
նրան ուղղված աղաղակս նրա ականջին է հասնելու:
Ցնցվեց ու դողաց երկիրը,
և լեռների հիմքերը սասանվեցին ու խախտվեցին,
քանզի բարկացավ նրանց վրա Աստված:
Նրա բարկությունից ծուխ բարձրացավ,
երեսից հուր բորբոքվեց,
և կայծակներ ճարճատեցին նրանից:
Ցածրացրեց նա երկինքն ու իջավ,
և նրա ոտքերի տակ մառախուղ էր:
Ելավ նա քերովբեների վրա ու թռավ,
սլացավ հողմի թևերով:
Խավարն իր համար ծածկույթ դարձրեց,
և շուրջբոլորն իր տունը եղավ՝ օդի ամպերի թանձր ջրերով:
Նա փայլատակեց նրանց առջև,
ամպերը կարկուտ և հրեղեն կայծակներ արձակեցին:
Որոտաց Տերն երկնքից,
և Բարձրյալն իր ձայնը լսել տվեց կարկտով ու հուր կայծակներով:
Ուղարկեց իր նետերն ու ցրեց դրանք,
շատացրեց իր կայծակները և սփռեց դրանք:
Քո զայրույթից, Տե՛ր, և քո բարկության հողմի շառաչից
երևացին ջրերի ակունքները, և հայտնվեցին հիմքերն աշխարհի:
Վերից փութալով՝ Տերը վերցրեց ինձ,
վերցրեց ինձ ջրերի հեղեղից:
Տերը կփրկի ինձ իմ զորեղ թշնամիներից ու ինձ ատողներից,
որոնք ավելի հզոր են, քան ես:
Նրանք ինձ վրա հասան չարչարանքներիս օրերին,
բայց Տերն ինձ զորություն տվեց
ու անդորրություն պարգևեց:
Եվ Տերը կփրկի ինձ,
քանզի նա ինձ հավանեց:
Տերն ինձ կհատուցի ըստ իմ արդարության,
ըստ իմ անբծության կհատուցի ինձ:
Ես կպահեմ Տիրոջ ճանապարհը
և իմ Աստծու դեմ ամբարշտություն չեմ անի:
Նրա բոլոր օրենքներն իմ առջև են,
նա արդարությունն իր չհեռացրեց ինձնից:
Եվ ես անբասիր կլինեմ նրա հանդեպ,
կզգուշանամ իմ անօրենությունից:
Տերն ինձ կհատուցի ըստ իմ արդարության,
ըստ իմ ձեռքերի մաքրության, որ նրա աչքի առջև է:
Սրբի հետ սուրբ կլինես, Տե՛ր,
անարատ մարդու հետ՝ անարատ:
Ընտրյալների հետ ընտրյալ կլինես
և խոտորվածներին կկործանես:
Դու փրկում ես հեզ ժողովուրդներին,
իսկ ամբարտավանների աչքերը խոնարհեցնում:
Դու լույս ես տալիս իմ ճրագին, Տե՛ր.
Աստուա՛ծ իմ, լուսավորի՛ր ինձ խավարում:
Քեզնով կփրկվեմ ես փորձությունից,
Աստծուս շնորհիվ պարիսպներ կհաղթահարեմ:
Աստվա՛ծ իմ, անթերի են քո ճանապարհները,
ընտիր են խոսքերը Տիրոջ,
նա ապավենն է բոլոր նրանց,
ովքեր հույսը դրել են նրա վրա.
քանզի Տիրոջից բացի ո՞վ է Աստված,
կամ ո՞վ է Աստված մեր Աստծուց բացի:
Աստվա՛ծ, դու ինձ ուժ պարգևեցիր
և իմ ճանապարհն անբիծ դարձրիր:
Ինձ ոտքեր տվիր եղջերուի ոտքերի նման,
և բարձր տեղերի վրա կանգնեցրիր ինձ:
Ձեռքերս վարժեցրիր պատերազմի,
իսկ բազուկն իմ դարձրիր ինչպես հաստ աղեղ:
Տվիր ինձ նաև քո փրկարար պաշտպանությունը:
Աջդ զորավիգ եղավ ինձ,
իսկ խրատդ միշտ կանգուն պահեց.
քո խրատն իմաստուն կդարձնի ինձ:
Ընդարձակեցիր ուղիս իմ ոտքերի տակ,
և ընթացքն իմ չտկարացավ:
Հալածելով թշնամիներիս՝ ես կհասնեմ նրանց
ու ետ չեմ դառնա, մինչև չոչնչացնեմ նրանց:
Ես կընկճեմ նրանց, որ այլևս չկարողանան կանգնել,
և նրանք կընկնեն իմ ոտքերի տակ:
Դու ինձ պատերազմելու զորություն տվիր,
դեմս ելնողներին ոտքերիս տակ գցեցիր:
Թշնամիներիս դու հալածեցիր,
իսկ ինձ ատողներին ոչնչացրիր:
Աղաղակեցին նրանք, բայց չկար մեկը, որ փրկեր նրանց,
կանչեցին Տիրոջը, բայց նա չլսեց նրանց:
Ես կփշրեմ, հողմափոշի կդարձնեմ նրանց,
փողոցների ցեխի պես կտրորեմ նրանց:
Տերն ինձ կփրկի ժողովրդի ըմբոստությունից
և ինձ հեթանոսների գլուխ կկարգի:
Իմ չճանաչած ժողովուրդն ինձ ծառայեց
և համակ ականջ դարձած՝ լսեց ինձ:
Օտարների որդիներն ինձ ստեցին,
օտարների որդիները մաշվեցին՝ խոտորվելով իրենց շավղից:
Կենդանի է Տերն ու օրհնյալ է Աստված,
և թող բարձր լինի Աստվածն իմ փրկության:
Աստվածն իմ, որ լուծում է վրեժն իմ
և ժողովուրդներին ինձ է հնազանդեցնում,
որ փրկում է ինձ իմ գազազած թշնամիներից.
դու բարձր դասեցիր ինձ իմ հակառակորդներից,
անիրավ մարդուց ազատեցիր ինձ:
Դրա համար գոհություն պիտի մատուցեմ քեզ հեթանոսների մեջ
և քո անվանը սաղմոս պիտի երգեմ:
Դու փրկությամբ մեծարեցիր թագավորիդ՝
ողորմելով քո օծյալ Դավթին ու նրա սերնդին հավիտյանս հավիտենից:
#եկեղեցի #հայաստան #հոգեւոր #սեր #երեւան #աղոթք #հավատք #armenia #shorts #yerevan
![](https://i.ytimg.com/vi/F3HLNAqZyM0/maxresdefault.jpg)