Официальный сайт NVK-ONLINE.RU - Бэс ыйын 15 күнүттэн Былатыан Ойуунускай аатынан Саха академическай тыйаатырын сыанатыгар саха литэрэтиирэтин биир бөдөҥ айымньытынан Николай Якутскай романынан «Төлкө» испиктээкил сурэхтэниитэ буолар. Туруоруу Саха Өрөспүүбүлүкэтин норуодунай артыыһа, Россия үтүөлээх артыыһа Зоя Багынанова үбүлүөйүгэр ананар.
Амма Аччыгыйа «Сааскы кэм», Николай Гоголев «Хара кыталык» курдук бөдөҥ айымньылар Саха тыйаатырын сыанатыгар турбут буоллахтарына, революция иннинэ саха норуотун олоҕун-дьаһаҕын кэпсиир үс чаастаах «Төлкө» роман саамай интэриэһинэй бастакы олуга «Хараҥа түүн» бүтүннүү 2 чаас 45 мүнүүтэ устата бу испиктээкилгэ көстүөҕэ. Маны сэргэ аан маҥнайгытын көрөөччүлэргэ тиийэ сыананы ситимниир муоста тардылынна.
Саха норуодунай артыыһа Зоя Багынанова бу саас 75 сааһын туолбута. Айар дьылҕата Ньурба тыйаатырыгар «Төлкө» испиктээкилгэ Маайа оруолуттан саҕаламмыта. Бу сырыыга кини Огдооччуйаны оонньуур.
Испиктээкилгэ тыйаатыр артыыстара бары кытталлар. Режиссер сүрүн оруолларга Щепкин училищетин выпусниктарын туруорда. Маайалаах Сүөдэр олох очурдарын ааһан туран күүстээх тапталларын өрө туппут дьылҕаларын Нюргуяна Шадрина уонна Дмитрий Татаринов көрдөрүөхтэрэ.
«Төлкө» Саха тыйаатырын сыанатыгар аан маҥнайгытын турар. Декорацияны Михаил Егоров, көстүүмнэри Сардаана Федотова оҥордулар. Биллэн турар, сүрүн сыананы көрөөччү, норуот биэрэр. Оттон ол көстүү хайдах буолбутун 4 күн субуруччу испиктээкил сүрэхтэниитигэр көрүҥ.
