ဖုန်းနဲ့ Low light ဓာတ်ပုံ ရိုက်ကူးနည်း
Low light Photography ဆိုတာက
အလင်းနည်းတဲ့ အချိန်၊ အလင်းနည်းတဲ့ နေရာတွေမှာ အလင်းနည်းနည်းလေးနဲ့ ပုံဖော်တဲ့ ဓာတ်ပုံပညာတစ်ခုပဲ ဖြစ်ပါတယ်
အလင်းနည်းတဲ့ အချိန်ဆိုတာက
ညဘက်လည်း ဖြစ်နိုင်သလို နေ့ဘက်လည်း ဖြစ်နိုင်ပါတယ်၊ နေ့ဘက် အလင်းသိပ်မရောက်နိုင်တဲ့ လှိုဏ်ဂူတို့ အိမ်အခန်းအတွင်းပိုင်းတွေလို နေရာတွေဟာလည်း Low light ရိုက်လို့ကောင်းတဲ့ နေရာတွေပဲ ဖြစ်ပါတယ်၊ အရှင်းဆုံးပြောရရင် အလင်းအမှောင် သိသိသာသာ ခြားနားတဲ့ နေရာမျိုးတွေမှာ ရိုက်လို့ရပါတယ်
အနီးစပ်ဆုံး ဥပမာပေးရရင်တော့ ပြတင်းပေါက်လို့ နေရာမျိုးတွေပါ
ပြတင်းပေါက် အပြင်ဘက်က လင်းနေမယ်၊ အတွင်းဘက်ကတော့ မှောင်နေမယ်၊ ပြတင်းပေါက်ကနေ ဝင်လာတဲ့ အလင်းလေးလည်း ရှိနေမယ်ဆိုရင် Low light ကောင်းကောင်း ရိုက်လို့ရပါပြီ၊ ညဘက်လို လုံးဝမှောင်နေတဲ့ နေရာမျိုးတွေမှာတော့ အလင်းပေးဖို့ လိုပါတယ်၊ ဖယောင်းတိုင်မီးနဲ့လည်းရသလို LED မီးတွေ Flash တွေနဲ့လည်း အလင်းပေးပြီး ရိုက်လို့ရပါတယ်
Low light Photography က
Light and Shadow ကို အသားပေးပုံဖော်ရတာမျိုး ဖြစ်ပါတယ်၊ ဒါကြောင့်မို့ လုံးဝလင်းထိန်နေတဲ့ နေရာမျိုးတွေမှာတော့ ရိုက်လို့မရနိုင်ပါဘူး၊ အနည်းဆုံးတော့ Background မှာ အလင်းလုံးဝမရှ်ိနေဖို့ လိုပါတယ်၊ ကင်မရာကတော့ အလင်းကိုပဲ ဖမ်းယူတာ ဖြစ်ပါတယ်၊ အလင်းမရှိရင် အမည်းကြီးပဲ ရိုက်ယူပေးမှာ ဖြစ်ပါတယ်
ရိုက်တဲ့အခါမှာလည်း ကျနော်တို့ဟာ Exposure (အလင်း) တန်ဖိုးကို လျှော့ချပြီး ရိုက်ရမှာ ဖြစ်ပါတယ်
Mobile Phone တွေနဲ့ ရိုက်မယ်ဆိုရင်
Exposure (အလင်း) တန်ဖိုးကို လျှော့ချဖို့ နည်း (၂) နည်း ရှိပါတယ်
ပထမတစ်ခုက Screen Exposure ပါ
Mobile Phone နဲ့ ဓာတ်ပုံရိုက်ရင် ဖုန်းမျက်နှာပြင်ကို လက်နဲ့ထောက်လိုက်ရင် အဝိုင်းလေးတစ်ခု ပေါ်လာပါတယ်၊ အဲ့အဝိုင်းလေးဘေးမှာ မျှားလေးတစ်ခု ပါပါတယ်၊ အဲ့မျှားလေးကို အပေါ်ကို ဆွဲတင်ရင် အလင်းတန်ဖိုး မြင့်လာမှာဖြစ်ပြီး အဲ့မျှားလေးကို အောက်ဆွဲချရင်တော့ အလင်းတန်ဖိုးကျသွားမှာ ဖြစ်ပါတယ်၊ Low light Photography က အလင်းတန်ဖိုး လျှော့ချရိုက်ရမှာမို့ အောက်ထိဆွဲချပြီး ရိုက်ရမှာ ဖြစ်ပါတယ်
နောက်တစ်နည်းကတော့ Manual mode မှာ
Exposure (အလင်း) တန်ဖိုးကို လျှော့ချရိုက်ကူးနိုင်ပါတယ်၊ Mobile Phone Camera တွေရဲ့ Manual mode မှာ ISO ရယ် Shutter speed ရယ် နှစ်ခုပဲ ပါတာမို့ အဲ့နှစ်ခုကို အတိုးအလျှော့လုပ်ပြီး ရိုက်ကူးနိုင်ပါတယ်၊ EV ဆိုတာလေးကို လျှော့ချပြီး ရိုက်လည်း ရပါတယ်
ISO ရဲ့ သဘောတရားကတော့
50, 100 တို့လို နံပါတ်နည်းလေး အလင်းနည်းလေမို့ အနည်းဆုံးထားထားလို့ရပါတယ်၊ အဓိက ကစားရမှာက Shutter speed ပါ၊ Shutter speed ကို 1/100 လောက်ကနေ 1/200, 1/500, 1/1000, 1/2000 စသဖြင့် တဖြည်းဖြည်းတိုးပြီး ရိုက်သွားရပါမယ်၊ 1/ ရဲ့နောက်မှာ နံပါတ်များလာလေလေ အလင်းတန်ဖိုး ကျလာလေလေပါပဲ၊ အဲ့လိုတိုးသွားရင် ကိုယ်လိုချင်တဲ့ အလင်းအမှောင် ပမာဏရရင် ရိုက်လိုက်လို့ ရပါပြီ
ရိုက်တဲ့အခါမှာတော့
ကိုယ့်ရဲ့ အဓိက Subject ကို အလင်းရှိရာနေရာမှာ ထားရပါမယ်၊ အလင်းနဲ့ Subject နဲ့ ထိတွေ့နေရပါမယ်၊ ပြီးရင်တော့ ကိုယ့် Subject ရဲ့ အလင်းဆုံးနေရာကို Focus ဖြတ်ပြီး အလင်းကို လျှော့ချပြီး ရိုက်လိုက်ရင် ရပါပြီ
Mobile Phone Camera နဲ့ Low light ရိုက်ရင်တော့
Screen Exposure ကို သုံးပြီးရိုက်တာကို ပိုပြီးတော့ အားပေးပါတယ်၊ ကျနော်ကိုယ်တိုင်လည်း Screen Exposure ကို အများဆုံး သုံးပါတယ်၊ သုံးရလွယ်ကူပြီးတော့ မြန်ဆန်စေပါတယ်
ဒီနေရာမှာ Low light Photography ဆိုတာနဲ့
လူတွေရဲ့ မျက်နှာတွေကို ရိုက်ထားတာကိုပဲ လူတွေက ပြေးမြင်တတ်ကြပါတယ်၊ အမှန်တကယ်က ပုံသေမရှိပါဘူး၊ Low light ရိုက်တဲ့အခါ လူလည်း ဖြစ်နိုင်သလို ပန်းတစ်ပွင့်၊ အရုပ်တစ်ရုပ်လည်း ဖြစ်နိုင်ပါတယ်၊ လူမျက်နှာပုံတွေ ဘာလို့အရိုက်များလည်း ဆိုရင်တော့ လူတွေရဲ့ မျက်နှာကို Low light ရိုက်တဲ့အခါ Shape တွေက ပိုပေါ်လာပါတယ်၊ နောက်ပြီးတော့ သူတို့မျက်နှာက Texture တွေ၊ Emotions တွေ၊ မျက်လုံးတွေကို ပိုပြီးတော့ ခံစားပုံဖော်လို့ ရလို့ပဲ ဖြစ်ပါတယ်၊ ဒါကြောင့် အရိုက်များကြတာပါ၊ မိန်းကလေးတွေဆိုရင်လည်း သူတို့ခန္ဓာကိုယ်ရဲ့ ကောက်ကြောင်းတွေကို Low light နဲ့ ပုံဖော်ပြသရိုက်ကူးတတ်ကြပါတယ်
နောက်ပြီးတော့
ကိုယ့်ရဲ့ Portfolio အတွက်ဖြစ်ဖြစ်၊ Facebook profile အတွက်ဖြစ်ဖြစ် လူတစ်ပိုင်းပုံတွေကို Low light ရိုက်တတ်ကြပါတယ်၊ အလင်းအမှောင်ရဲ့ စွမ်းအားကြောင့် လူရဲ့မျက်နှာသွင်ပြင်ဟာ တည်ကြည်ခန့်ငြားတဲ့ ပုံစံမျိုးတွေ ရရှိစေပါတယ်၊ အများစုကတော့ ဒီလိုပုံတွေကို အဖြူအမည်း အသုံးပြုတတ်ကြပါတယ်
ဒီနေရာမှာ တစ်ခါတည်းကြုံလို့ ပြောပြချင်တာလေး ရှိပါတယ်
လူတွေရဲ့ မျက်နှာသွင်ပြင်ကို
Low light ရိုက်ကူးတဲ့အခါ မျက်လုံးက အဓိကကျပါတယ်၊ လူရဲ့မျက်နှာမှာ မျက်လုံးက အရေးကြီးဆုံး ဖြစ်သလို လူတွေရဲ့ စိတ်ခံစားချက်တွေကိုလည်း မျက်လုံးကတစ်ဆင့် ဖော်ပြပေးနိုင်ပါတယ်၊ ဒါအရေးကြီးဆုံး အချက်ပါပဲ
ဒါကြောင့် မျက်လုံးကို သေချာပြတ်သားနေအောင် ရိုက်သင့်ပြီး
မျက်လုံးအတွင်းမှာလည်း အလင်းပေါက်လေးပါအောင် ရိုက်ကူးသင့်ပါတယ်၊ မျက်လုံးအတွင်းက မျက်လုံးအိမ်အမည်းအဝိုင်လေးထဲမှာ အလင်းပေါက်လေးတွေ ပါဝင်အောင် ရိုက်ကူးတတ်ဖို့ အရေးကြီးပါတယ်၊ ဒါမှ မျက်လုံးက ပိုပြီး အသက်ဝင်နေမှာပါ၊ အဓိကကတော့ အလင်းလာရင် လမ်းကြောင်းဘက်ကို မျက်လုံးက ကြည့်နေမယ်ဆို သေချာပေါက် အလင်းပေါက်လေး ပါနိုင်ပါတယ်၊ အဲ့အချက်လေးကိုလည်း သတိပြုစေချင်ပါတယ်
ကိုယ့်လက်ထဲက ဖုန်းလေးနဲ့
Low light ဓာတ်ပုံကောင်းတွေ ဖန်တီးနိုင်ကြပါစေ
ရေးသားသူ - အောင်ချမ်းသာ
Learn Photography
Anytime, Anywhere 📸
အချိန်မရွေး၊ နေရာမရွေး
MPA မှာ ဓာတ်ပုံပညာ လေ့လာနိုင်ပါတယ် 📸
#MPA #PhotographyNotes
#LearnPhotographyAnytimeAnywhere
#myanmarphotographyacademy
#foryou #foryoupage #photography
![](https://s2.save4k.ru/pic/FrakSdiK8LQ/maxresdefault.jpg)