Në zhurmën e krijuar ditën e djeshme me akuzat dhe kundërakuzat për rastin e denoncimit të ish-policit, Emiljano Nuhu, gazetari i Report Tv, Artan Hoxha hedh më shumë dritë për atë që po ndodh dhe arsyet. Hoxha ka publikuar në faqen e tij në Facebook një foto të Emiljano Nuhut së bashku me ish-oficerin Dritan Zagani në Zvicër. Ai thotë se Nuhu ka kërkuar azil në Zvicër, aty ku ndodhet edhe Dritan Zagani, ndërsa hedh dyshime sesi ka arritur kaq shpejt atje, madje të pajisjet me dokumente qëndrimi azilanti dhe çfarë i lidh bashkë.
Artan Hoxha ka publikuar dy foto, njërën ku shfaqen Dritan Zagani dhe Emiljano Nuhu, të fotografuar së bashku në Gjenevë të Zvicrës dhe e dyta dokumentet e qëndrimit në Zvicër, të familjes së nënkomisarit Nuhu, Emiljanos, bashkëshortes së tij dhe fëmijës, të lëshuara në Gjenevë.
Gazetari Hoxha ka edhe një mesazh për Zaganin, teksa i thotë se e ka mbështetur në denoncimin kundër narkotrafikut por në sajesat dhe mashtrimet alla Babale, sikur i cilëson ngjarjet e fundit, nuk e ndihmon dot. ‘Dritan Zagani të kam mbështetur në denoncimin kundër narkotrafikut por në sajesat dhe mashtrimet alla Babale, nuk të ndihmoj dot. Shijojeni azilin dhe lëreni militantizmin politik se sajesat dhe mashtrimet dalin shumë shpejt....’ thotë Hoxha.
Emiljano Nuhu u largua nga Shqipëria në datë 13.09.2018 duke braktisur detyrën, ndërsa nuk dorëzoi sipas procedurës standarde armatimin dhe materialet operative. Ai kaloi kufirin në mënyrë të paligjshme drejt Kosovës dhe në datë 15 shtator 2018 ka udhëtuar me avionin e linjës Prishtinë–Verona, ndërsa më pas është larguar, sipas gazetarit Hoxha në drejtim të Zvicrës duke u pajisur me dokumente azili.
![](https://i.ytimg.com/vi/FruIIE_A9pU/maxresdefault.jpg)