Бүгін Ұлы Отан соғысының басталғанына 74 жыл. «Адамзат тарихындағы ең алапат соғыстың әкелген қасіретін ешқашан ұмытпаймын», – дейді ардагер Өміржан Мұхаметжанов. Бүгінде 91-ге келген қария артта қалған күндердің естеліктерімен бөлісті.
Осыдан 74 жыл бұрын 22 маусымда таңғы 04.00 шамасында фашистік Германия ешқандай ескертусіз Кеңес Одағына басып кірді. Соғыс басталғанда Алматы облысы Жамбыл ауданындағы Сұраншы батыр ауылының тұрғыны Өміржан Мұхамеджанов 14 жаста болыпты. Әкесі алғашқы күннен-ақ Отанды қорғауға кетіп, 1943 жылы қара қағаз келеді. Талай отбасына осындай қасірет әкелген соғыстың тезірек аяқталып, Жеңіс күнін жақындату үшін ол 1944 жылы майданға аттанады.
Өміржан Мұхаметжанов, Ұлы Отан соғысының ардагері
-Польшаға апарды. Польшада қатты соғыс болып жатыр екен. Польшада 2-3 ай болып, ары қарай жылжып, Румынияны басып, азат етіп, Болгарияны азат етіп, содан Германияның шетіне барғанда: «Мына қаланы қоршайсыңдар, ешкімді шығармайсыңдар, ешкімді кіргізбейсіңдер», – деді.
Сын сағаты туғанда Отанды қорғаудан Қазақстан азаматтары да тыс қалған жоқ. Республикада 2 миллионнан астам адам әскери даярлықтан өтіп, соғыстың алғашқы кезеңінде 14-атқыштар және атты әскер дивизиясы, 6 бригада құрылып, майданға жіберілді. Қан майданнан 600 мыңдай қазақстандық қайтып елге оралмады.
Зәурехан Мұхаметжанова, ардагердің зайыбы
-5 адам бір үйден кетті ғой. Әкем баласымен, тағы үш бауырымыз кеткен. Оның екеуі жоқ болып кетті де, әкем баласы екеуі келді.
Жеңіс мерекесін Польшада қарсы алған ардагер елге 50 жылы оралады. Совхозда қарапайым еңбек адамы болып жұмыс істеген Өміржан ата Заурехан апамен бас қосып, 5 ұл, 2 қыз тәрбиелеп өсірді. Қазір олардан 23 немере, 15 шөбере көріп отыр.
Ұлы Отан соғысының 70 жылдығына орай Сұраншы батыр ауылында ерлікке тағзым ескерткіші бой көтерді. Мұнда майданнан оралмаған 254 азаматтың есімі жазылған. Олардың ерлігі ұрпақтың жадында мәңгі сақталатыны сөзсіз.
Авторлары: Гүлжан Көленқызы, Валентин Лобанов
Ещё видео!