Бугунги жонли дастуримиз Ўзбекистон президенти Шавкат Мирзиёевнинг виртуал қабулхонасига бағишланади. Ўзбекистон тарихида мисли кўрилмаган бу виртуал идора Шавкат Мирзиёев ҳали бош вазир даврида очилган, ва у президентликка сайланиши ортидан Президент виртуал қабулхонасига айлантирилганди.
Мақсад ҳар бир кишига Ўзбекистон давлат раҳбарига ўз ариза, таклиф ёки шикоятини юборишни осонлаштириш, йиллар оша давлат раҳбарлари ва халқ ўртасида пайдо бўлган кенг жарликни қисқартириб, халқ билан мулоқотни ошириш эди. Шу кунгача, мана икки йилдан ошиқ давр ичида, виртуал қабулхонага 2 ярим миллиондан ошиқ мурожаат келиб тушган, сайтда янгиланиб турадиган бу кўрсаткичга қаралса, 50 мингдан ошиқ мурожаатдан ташқари деярли ҳаммаси кўриб чиқилган.
Президентга мурожаат қилиш ҳар бир Ўзбекистон фуқаросининг конституцион ҳуқуқи, албатта, уларнинг барчасини президентнинг шахсан ўзи кўриб чиқишига жисмонан имкони йўқ, лекин кўплаб идоралар бунга жалб этилган ва кейинроқ ҳатто жойларда Халқ қабулхоналари ташкил қилинди. Бутун Ўзбекистон бўйлаб, 12 та вилоят, Қорақалпоғистон республикаси ва Тошкент шаҳрида камида 10тадан шундай қабулхоналар очилган. Тошкент вилоятидаги бир тумандан келган маълумотга кўра, халқ қабулхоналари ходимлари ҳозирда ҳатто уйма-уй юриб, мурожаатларни йиғишмоқда.
