Біздің мемлекеттік шекараның барлық периметрі бойынша жоспарлы шекаралық операция жүріп жатқаны белгілі.
Осы шара басталғалы бір ғана Қордай учаскесінде 4 қылмыстық заң бұзушылық анықталған. Қазақстан мен Қырғызстан шекарасының бұл бөлігі шамамен 245 шақырым болады.
4 қылмыстың бірінде бір азамат жалған құжатпен Қырғызстаннан Қазақстанға машина алып өтпек болған. Тағы үш адам мемлекеттік шекараны қасақана бұзып, біздің елдің аумағына заңсыз өтуі кезінде қолға түскен. Қазір бұл деректер бойынша тергеу амалдары жүріп жатыр.
Өзбекстан азаматына әзірге айыппұл ғана салынды. Егер оны бір айдың ішінде төлемейтін болса, онда сот арқылы жауапкершілікке тартылады. Шекараны заңсыз бұзғандардың бірі – Бегайым Жүсіпова. Алпысты еңсерген әйел көрші қырғыз елінен жұмыс іздеп келіпті. Бірақ шекарадан заңсыз өткен.
Бегайым Жүсіпова, Қырғызстан азаматы:
- Тиын қылайын деп осы жаққа келгенмін. Қармалып қалдым. Қырғызстанда жұмыс жоқ. Балаларым да жоқ.
Камидин Галев, Тәжікстан азаматы:
- Мен Тәжікстаннан келдім. Жұмыс іздеп Қордайға келіп едім. Заң талаптарын сақтамаған соң ұсталып қалдым.
Жалпы жоспарлы шекаралық операция басталғалы бері шекаралық режимді бұзған 76 адам анықталған. Ал 27 адам көші-қон заңын бұзғаны үшін айыпталып отыр. Заң талаптарын бұзған өзге адамдар да тиісті жауапқа тартылды. Күні кеше Қордай өткізу пункті арқылы есірткі алып өтпекші болған Қырғызстанның бір азаматы ұсталды. Қазір сотқа дейінгі тергеу амалдары жүріп жатыр.
Ержан Мақсұт, ҚР ҰҚК Шекара қызметі 20/38 әскери бөлімінің анықтау және іс жүргізу бөлімінің бастығы:
- ҚР аумағында жүргенде төлқұжаттарын, жеке құжаттарын жоғалтып алады. Сондықтан шетел азаматтары өздерінің елшілігіне бармай, біздің аумақтан заңсыз түрде өтуге іс-әрекеттер жасайды.
Жалпы аталған операцияның мақсаты – шекара кеңістігінде заңға қайшы әрекеттердің, террористік, контрабандалық және өзге де қылмыстық іс-қимылдың жолын кесу. Шекаралық режимнің және көші-қон заңнамасының сақталуын қадағалау. Бақылау күшейтілгенімен, шекараны өтуге қандай да бір шектеулер мен тыйымдар салынған жоқ.
Авторлары: Ұлан Нарынбек, Сержан Жұмабаев
