Love Song ka sak caah ka sual, Love Song ka sa lo i, ka thiang ti khi a si lo. Pathian hla a sami zong nih Love Song cu kan ngaih ko. Love Song a sa mi kha misual ah hmuh peng in zuun hla a ngaimi kha misual ah kan ruah deuh hlei hna awk a si lo. Pathian hla a sa mi zong mi thiang bik ah kan i ruah hlei ding a si lo. Love Song sak le sak lo hi sual le sual lo tahnak fung a si lo.
Love Song a sa mi tampi hi aa tuah thiammi le hmanrua tete tampi an um ve ko. Midang caah an santlaihnak zong a tampi ve ko. Tuchan Love Song sa tampi belte Gangster bantuk a lomi kan tampi. Mirang nun kan dawi caah sitama bantuk, night club ah a laam lai bantuk phun in kan i thuam i, zapi mit ah kan dam lo. Ruah lo le ruah lo mipi nih an ruat i, an kan lunghrinh. An kan zohchuk deuh kan ti lai cu. A ruang cu kan acting le kan thilthuam le kan tatto ruangah an si bik. Love Song hi a mah bing te ahcun a sual lo.
Amah belte Love Song sak le Love Song ngaih cu mi a cuai i, nun zong a tolh. Mi nun a cawm lo. Duhmi le dawtmi a ngeimi tu nih kan hrial khawh lomi tu a si. Pathian lei thil a si lo caah mi nun a tawng lo. Mi thazaang a pe lo. Pathian sunparnak caah a si lo. Cu ruangah Pathian hla tu kan sak le kan ngaih deuh awk tu a si. Zumtu ttha tam deuh cu Pathian hla tam deuh an ngai tawn. Love song cu an ngaih hmanh ah an sa lai lo, mitthli he an i cuai pi lai lo. Love song a sa mi belte nih Love Song sak cu sual a si lo ti cu an cohlan ko lai nain zumtu caah a ttha lo ti an duh lai lo. Love Song nak in Pathian hla kan sak ding a biapi ngaingai.
Pathian hla kan sak mi belte hi tuchan ahcun laarnak deuh ah kan hman i, mah hihi a poi tuk i a si. Bawipa Min thannak caah si loin kanmah min tu a thang. Singer kan i ti i, mirang bantukin concert tiang kan tuah. Evangelist bang zei bang kan vak ve rih. Pulpit hi mah min i hlorhnak hmun a si lo. Jesuh Min hlorhnak hmun a si. Bible ah Singer hi thawngtha chimnak ah an i ken bal hna lo. Nihin kan chan 1970 hnu lawng in kan tuah chom mi a si. Kan tuahmi hi Bawipa nih a sunparnak a co lawngah an hmun lai. Kan aw zai in Bawipa nih sunparnak co chinchin ko seh!
![](https://i.ytimg.com/vi/HDD5gOPIZzk/mqdefault.jpg)