Rusiyanın Azərbaycanlı Gənclər Birliyinin VII forumu
Son illər Azərbaycanla Rusiya arasında sosial-mədəni əlaqələr yeni inkişaf mərhələsinə daxil olub. Bu əlaqələrin genişlənməsində Azərbaycanın tərəqqisi, mədəniyyətinin inkişafı və tarixinin tanıdılması istiqamətində misilsiz fəaliyyət göstərən Heydər Əliyev Fondunun rolu danılmazdır. Fondun Rusiya nümayəndəliyinin işi bu baxımdan daha qabarıq hiss olunur. Nümayəndəliyin rəhbəri, Fondun vitse-prezidenti Leyla Əliyeva Azərbaycanın zəngin və qədim tarixinin, milli-mənəvi dəyərlərinin, mədəniyyətinin, incəsənətinin, ədəbiyyatının Rusiyada təbliği, diaspor hərəkatının genişləndirilməsi istiqamətində bütün gərəkli tədbirləri həyata keçirir. 2007-ci ilin dekabrında Leyla Əliyevanın baş redaktorluğu ilə nəşrə başlayan "Bakı" jurnalı da Azərbaycanın və onun paytaxtının təbliği baxımından xüsusi əhəmiyyətə malikdir. Rusiyalı oxucular bu nəşr vasitəsilə ölkəmiz barədə daha dolğun məlumatları əldə etmək imkanını qazanırlar.
2009-cu il aprelin 18-də Moskva şəhərində Leyla Əliyevanın sədrliyi ilə Rusiyanın Azərbaycanlı Gənclər Birliyi (RAGB) təsis edilmişdir. RAGB Rusiyada yaşayan və çalışan Azərbaycan gəncliyini birləşdirməklə onların Rusiya cəmiyyətinə inteqrasiyası və müasir cəmiyyətin üzvü olmasına köməklik göstərir. Bu təşkilat qarşılıqlı etimada əsaslanan münasibətləri daha da möhkəmlətmək, dialoq üçün əlverişli platforma yaratmaqla iki ölkə arasında qarşılıqlı inteqrasiya proseslərini gücləndirmək istəyindən çıxış edir. Təşkilat Azərbaycan həqiqətlərinin Rusiya ictimaiyyətinə çatdırılmasında mühüm işlərə imza atmışdır. RAGB-nin 70-dən çox regional bölməsi fəal iş aparır. Azərbaycan və rus gənclərinin sıx birləşməsində "AMOR" jurnalı, habelə təşkilatın saytı xüsusi rol oynayır.
RAGB-nin təşəbbüsü ilə Rusiyada hər il fevral ayında erməni təcavüzkarları tərəfindən törədilən Xocalı soyqırımının ildönümü ilə bağlı "Xocalıya ədalət" aksiyası keçirilir. Ötən dövrlər ərzində uğurlu təbliğatı ilə aksiyaya dünyanın əksər ölkələrindən yüzlərlə könüllü qoşulub. Təbliğat-təşviqat kampaniyası yalnız Xocalı soyqırımını dünyaya tanıtmaqla kifayətlənmir, eyni zamanda, Ermənistanın dağıdıcı və təcavüzkar siyasətinin ifşası ilə bağlı aktiv iş aparır. RAGB-in fəaliyyəti istedadlı gənclərin dəstəklənməsi, xeyriyyəçilik tədbirlərinin təşkili baxımından olduqca əhəmiyyətlidir. Birlik hər il bir sıra layihələrlə çıxış edir, xeyriyyə aksiyalarına imza atır, eyni zamanda beynəlxalq tədbirlərdə təmsil olunur.
RAGB hər ilin sonunda hesabat xarakterli forum təşkil etməklə, il ərzində görülən işlər, gələcək layihələr, gəncliyin müxtəlif sahələrdə təmsil olunması, gənclərin dövlətə töhfələri ilə bağlı ümumi müzakirələr həyata keçirir. 6 dekabr tarixində “RAGB nəsli: Vətənpərvərlik, Yaradıcılıq, Uğur” adlı altında VII forum işə başladı. Forumda 500-dən çox nümayəndə, fəxri qonaqlar, Rusiya və Azərbaycanın rəsmi şəxsləri iştirak edirdi. Tədbirin əvvəlində forum iştirakçıları “Müstəqil Azərbaycan – 25 il” sərgisi, RAGB-nin 2016-cı ildəki fəaliyyətinə həsr edilmiş filmlə tanış oldular. Daha sonra isə, Heydər Əliyev Fondunun vitse-prezidenti, RAGB-nin sədri Leyla Əliyeva çıxış nitqi ilə tədbir iştirakçılarını salamlamış və Birliyin fəaliyyəti, reallaşdırdığı layihələr haqqında məlumat və tövsiyələrini vermişdir.
Forum çərçivəsində "Multikulturalizm millətlərarası və dövlətlərarası münasibətlərin əsası kimi", “2017-ci il Rusiyada ekologiya ili - Azərbaycan gəncliyinin töhfəsi”, “Rusiyanın Azərbaycanlı Gənclər Birliyinin diasporun möhkəmlənməsində rolu" və "Gənclər biznesdə: startapların yaranması və inkişafı" mövzularında bölmə iclasları keçirildi. Tədbirin sonunda əlaçı tələbələrin, RAGB-nin keçirdiyi müsabiqə qaliblərinin və gənclər təşkilatının fəallarının təltif edilməsi mərasimi oldu.
Şübhəsiz demək mümkündür ki, RAGB Azərbaycanın zəngin tarixinin, mədəniyyətinin nəinki Rusiyada, bütün dünyada layiqincə tanınmasına xidmət edir, Azərbaycan-Rusiya əlaqələrinin hərtərəfli inkişafına, iki dövlət arasında dostluğun möhkəmlənməsinə öz töhfələrini verir.
![](https://i.ytimg.com/vi/HmF3fc-pej4/mqdefault.jpg)