Бәріңізге ассалаумағаликум. Тұңғыш Президенттің тұңғыш қызы қазір қайда?Дариға Назарбаева билік үшін талас-тартыста не жоғалтты, не ұтты? 20 жылда қалай тез байып кетті? Қазіргі байлығы қанша? Оның биліктегі ғұмыры шынымен аяқталды ма? Нұрсұлтанқызына қатысты сұмдық ақпараттарды сізге білген дұрыс!
ҚАЙЫРЫМДЫЛЫҚ
Дариға Назарбаева туралы айтпас бұрын алдымен мына бір оқиғаға құлақ түріңіз. Басы жерге тигенше иіліп кешірім сұрап тұрған мына қыздың есімі Чо Хен. Ол атақты «Корея айрлайнесй» әуе компаниясы Президентінің қызы. 2014 жылы 5 желтоқсанда, ұшақ ұшуға дайындалып жатқанда бұл қыз ұшақты 20 минутқа ұшуға кешіктіреді. Онысымен қоймай стюардесса қызды қорлап, сол күнгі рейстен босатып тастайды. Сөйтіп әкесінің әуе компаниясы болған соң білгенін істейді. Әкесі Чо Ян Хо қызының бұл ісін естігеннен соң , қызын халықтың алдына шығарып кешірім сұратады. Және «Мен қызымды дұрыс тәрбиелей алмадым. Сол себептен барлығыңыздан кешірім сұраймын» деп ел алдында иіледі.
Енді өзіміздің қызға оралайық. 20 жылдай саясат сахнасында жүрді, көптеген қателіктерге жол берді. Талай-талай мәрте халықтың ашу-ызасына тиді. Бірақ ешқашан кешірім сұраған емес. Қайырылмай кетті, қайда жүргені де құп-құпия. Дариға Назарбаеваның негізгі мамандығы тарихшы. Бірақ тарихшы ретінде еш жерде қызмет етпеген, мұғалім де болмаған. Тарихшы бола алмаса да, Қазақстан тарихында әкесімен бірге аты қалды. Қазақстан тарихында әйелден шыққан тұңғыш сенат төрағасы болды. Қазақстан тарихына жиырма жылға жетер-жетпес уақытта шексіз байлық жиған әйел ретінде аты тарихқа енді... Сенат төрағасына дейін көтерілген қызмет жолына көз жүгіртсеңіз, Дариғадан қалған дара даңғылды байқай алмайсыз. Оның басып өткен қызметтерінің бәрі тек қана өсу, баю, шетелден қымбат сарайлар сатып алу... Дариға дәурен, өтті де кетті, қайтейін...осылай деген Жарас Кемелжанның «Жас алаш» газетінде жариялаған мақаласына зейін аударыңыз.
Тұңғыш президенттің тұңғыш қызы саяси қызметін тұңғыш рет қоғамдық жұмыстан бастапты. Анасы Сара Назарбаеваның жобасы арқылы көрінді. Ол — 1992-1994 жылдар. «Бөбек» балалар қайырымдық қорының вице-президенті. Одан кейін, 1995 жылы «Хабар» телеарнасын құрды. Бұл оның Қазақстан медианарығын игеруге кіріскен шағы болатын-ды. Дариға сол жылдары небәрі 32 жастағы уылжыған келіншек еді.
«Хабарды» сегіз 8 жылдай басқарған соң, ол 2003 жылы «үлкен саясатқа» бет бұрады. «Асар» деген партия құрды. Жұрт жылдар бойы шапқылап жүріп құрған партиясын тіркей алмай, табанынан тозса, Нұрсұлтанқызының партиясы еш кедергісіз тіркелді. Төрағасы болып бір ауыздан өзі сайланды. Айтпақшы, Ерлан Қарин сол жылдары «Асардың» құрамында болатын (Бұл бөлек әңгіме). 2004 жылғы мәжіліс сайлауы өтіп, «Асарға» мәжілістен бір орын бұйырады. Оған Дариға Назарбаева отырды. 2006 жылдың 4 шілдесінде «Асардың» кезектен тыс съезі өтті. Съезде «Отанмен» бірігу туралы шешім қабылданды. Сөйтіп, «Асардың» ғұмыры аяқталды… Осының өзі Қазақстандағы саяси жүйенің сайқымазақ екенін көрсетеді. Есі дұрыс Еуропа елдерінде саяси партиялар бір-бірімен бақталас, бәсекелес. «Отан» мен «Асарға» ұқсап, бірін-бірі «толықтыру» демократиялық елдерде сатқындық саналады. Бұл «індеттің» сарқыншағы биыл «Аманатқа» қосылған «Адалдан» да көрініс тапқан жоқ па?
Тақырыпқа оралайық. Бұдан ары қарай Дариғаның қызмет жолы парламент «партасында» жалғасты. Бірнеше шақырылымда депутат болды. 2014 жылдың сәуірінен 2015 жылдың қырқүйегіне дейін Нұрсұлтанқызы мәжілістің вице-спикері атанды. Дәл сол уақытта оның бірінші күйеуі Рахат Әлиев шетел түрмесінде асылып қалды. Бірақ Дариғаның қызметі жалғаса берді. 2016 жылы сенат депутаты болды. 2019 жылдың 19 наурызында әкесі Нұрсұлтан Назарбаев билікті Тоқаевқа тапсырды. Ал Дариға сенат төрағасы болып тағайындалды. Дәл сол кезде жұрт арасында әртүрлі алыпқашпа әңгіме желдей ескен. «Қазақстанның ендігі президенті Дариға Назарбаева болады екен», «Сенат төрағасы деген лауазым – келесі президентке апарар жол», деген сияқты болжамдар айтылған-ды. Осындай әңгімелердің әсері болар, ол бұл қызметте ұзақ отыра алмады. Сөйтіп, елдегі «екінші адам қызметінен» кетуге мәжбүр болды. Бірнеше айдан кейін Лондонда тұратын Айсұлтан Рахатұлы қаза тапты. Дариға баласының өлімінен кейін бірнеше ай көрінбеді. 2020 жылдың желтоқсанында мәжіліске қайта оралды.
Дариға Қазақстан тарихында әйелден шыққан бірінші сенат төрағасы болғанға дейін, яғни «Қазақстандағы екінші адам» болу үшін күйеуі мен ұлынан айырылды. Тарихта билік үшін болатын талас-тартыстардың тым қатал шежіресі Дариға қыздың басынан да өтті. Өкінішті болса да, өтті!.. Қаңтар қырғынынан кейін Дариғаның биліктегі ғұмыры аяқталды. Айтпақшы, Рахат Әлиев екеуінің арасындағы махаббат хикаясы тәмам болған соң, 2013 жылы «ҚазТрансГаз» компаниясының басқарма төрағасы Қайрат Шәріпбаевпен бас құрады.
Дариға қыздың отыз жылда жеткен биліктегі жетістігінен бөлек, оның жиған байлығының өзі есепсіз.
