Өмір сүргім келмейді - бұл жасөспірімдер арасындағы суицид тақырыбына негізделген бөлім. Дүниежүзілік денсаулық сақтау ұйымының деректері бойынша, Қазақстан суицидтің саны жағынан үшінші орын алады. Әлем бойынша да суицид саны 3 есеге артқан. Мұның себебі неде? Себебі енді есейе бастаған жеткіншектердің психикасы өте нәзік, жараланғыш боп келеді. Жасөспірімдер өз-өзіне қол салуына көп жағдайда отбасындағы жайсыздық пен мектепте түсінбеушіліктің орын алуы себеп болады. Олар өз отбасында ұрыс-керіс жиі туындағанда, алғашқы махаббаты сәтсіз болғанда, мектептегі сыныптастарымен достық қарым-қатынас орната алмаған жағдайда, олардың мазағына қалып, қорлық көрген кезде өлу туралы ойлайды. Өйткені кішкентай нәрсенің өзін ауқымды проблема ретінде қабылдайды. Өздеріне қиын көрінген жағдайдан шығудың «оңай жолын» таңдағысы келеді. Ертеңгі өмірін ойламай, болашағына балта шабады. Жас буынның бұлайша әлсіздік танытуына тек ата-ана, мектеп қана емес, тұтас қоғам кінәлі. Сондықтан оларға қашанда ата-ананың түсіністігі мен арнайы маманның көмегі ауадай қажет.
