Ռուս-ուկրաինական «անձնագրային հակամարտությունը» նոր թափ է հավաքում, Մոսկվան ոչ միայն ուկրաինացիներին է անձնագրեր բաժանում, այլ նաև Ուկրաինայի նորընտիր իշխանություններին է խորհուրդներ տալիս՝ ում անձնագիրը վերադարձնել, ում քաղաքացիությունը վերականգնել:
Ռուսաստանի նախագահ Վլադիմիր Պուտինը, ով անցյալ շաբաթ հրամանագիր էր ստորագրել Ուկրաինայի արևելյան շրջանների՝ ռուս անջատականների վերահսկողության տակ գտնվող Դոնբասի և Լուգանսկի բնակիչներին պարզեցված կարգով ռուսական անձնագիր տրամադրելու մասին, այժմ էլ կոչ է անում Ուկրաինայի ընտրյալ նախագահ Վլադիմիր Զելենսկուն Վրաստանի նախկին նախագահ, Օդեսայի նախկին նահանգապետ Միխեիլ Սաակաշվիլիին վերադարձնել ուկրաինական անձնագիրը:
«Միխեիլ Սաակաշվիլիին անօրինական կերպով է զրկվել ուկրաինական քաղաքացիությունից և անօրինականորեն է վտարվել Ուկրաինայի տարածքից», - հայտարարել է Սաակաշվիլիի ոխերիմ թշնամին համարվող Պուտինը՝ շարունակելով․ - «Նրան հարկավոր է վերադարձնել և վերականգնել նրա խախտված իրավունքները: Դա վերաբերում է նաև Ուկրաինայի մի շարք այլ քաղաքացիներին, որոնք ստիպված էին լքել երկրի տարածքը և հեռանալ ավետյաց երկրներ` փրկվելով գործող ուկրաինական վարչակազմի հետապնդումներից»:
Կրեմլի ղեկավարի այս հայտարարությունն անպատասխան չմնաց:
«Ո՞վ է Ուկրաինայի ապագա նախագահին խորհուրդ տալիս վերադարձնել իմ քաղաքացիությունը, Պուտի՞նը», - ֆեյսբուքյան իր էջում գրել է Վրաստանի նախկին նախագահը՝ շարունակելով․ - «Դա նույն Պուտինն է, որը 2017 թվականի դեկտեմբերին մամուլի ասուլիսի ժամանակ Պորոշենկոյից պահանջում էր վտարել ինձ Ուկրաինայից, ինչն էլ Պորոշենկոն արեց մեկ ամիս անց»:
Սաակաշվիլիին պնդում է, որ իրականում Պուտինի ներկայացուցիչները ոչ միայն Զելենսկուց պահանջում են չվերադարձնել իր քաղաքացիությունը, այլ նաև խիստ պայման են դնում՝ իրեն ներս չթողնել Ուկրաինա: «Նույնը պահանջել եք ոչ միայն Վրաստանից, այլ նաև Թուրքիայից, Հայաստանից, Ադրբեջանից», - գրել է Վրաստանի վտարանդի նախկին առաջնորդը, ով Պետրո Պորոշենկոյի հետ սկզբունքային տարաձայնությունների ֆոնին 2015 թվականին զրկվել է ուկրաինական քաղաքացիությունից և վտարվել երկրից:
Պուտինը որոշել է Սաակաշավիլիի անունը հիշատակել Զելենսկու հայտարարությունից հետո, որով Ուկրաինայի նորընտիր նախագահը պատասխանել էր Կրեմլի ղեկավարի աղմկահարույց հրամանագրին:
«Ուկրաինացիները գիտեն՝ ինչ է նշանակում լինել Ռուսաստանի քաղաքացի», - Ֆեյսբուքում գրել էր Վլադիմիր Զելենսկին և թվարկել․ - «Ազատազրկվել խաղաղ ցույցերի համար, չունենալ ազատ ու մրցակցային ընտրություններ, զրկված լինել մարդու հիմնարար ազատություններից և իրավունքներից»:
Անցած շաբաթ, հիշեցնենք, Վլադիմիր Պուտինը հրամանագիր է ստորագրել, որով դյուրացվում է Ուկրաինայի արևելքում ռուսամետ անջատականների վերահսկողության տակ գտնվող Դոնբասի բնակիչներին ռուսաստանյան քաղաքացիություն և անձնագիր տրամադրելու գործընթացը, որն այսուհետ կտևի ընդամենը երեք ամիս՝ դիմելու պահից սկսած: 2014 թվականին Ղրիմի թերակղզու բռնակցումից հետո Դոնբասի շրջանում սկիզբ առած պատերազմը մինչ օրս շարունակվում է: Մոսկվան, որը ֆինանսական օգնություն և ռազմական ուժեր է ուղարկում ուկրաինական երբեմնի արդյունաբերական Լուգանսկի և Դոնեցկի շրջաններ, անձնագրեր տրամադրելու որոշումը բացատրում է մարդասիրական նկատառումներով:
Կիևն ու Արևմուտքը խստորեն քննադատել են Պուտինի հրամանագիրը՝ այն անվանելով սադրիչ քայլ, որը խարխլում է իրավիճակի լարվածությունը թուլացնելու ջանքերը:
Մեր ուղիղ հեռարձակումները դիտեք այստեղ՝ [ Ссылка ]
«Ազատությունը» սոցիալական մեդիայում
Facebook - [ Ссылка ]
Twitter - [ Ссылка ]
Instagram - [ Ссылка ]
VKontakte - [ Ссылка ]
Odnoklassniki - [ Ссылка ]
